The news is by your side.

Advertisement

متحدہ کے مقتول کارکن اسلم کا کال ریکارڈ ڈیٹا حاصل کرلیا گیا

کراچی: گذشتہ روز وزیراعلیٰ ہاؤس پر پولیس کے مبینہ تشدد سے جاں بحق ہونے والے ایم کیو ایم کارکن اسلم کا کال ریکارڈ ڈیٹا حاصل کرلیا گیا ہے۔

اے آر وائی نیوز کے مطابق وزیراعلیٰ ہاؤس پر گذشتہ روز ایم کیو ایم کی جانب سے کئے جانے والے احتجاج پر پوائنٹ اسکورنگ کا سلسلہ جاری ہے اور ایم کیو ایم کارکنان پر تشدد اور اسلم نامی کارکن کے جاں بحق ہونے پر وزیراعظم نے بھی نوٹس لے لیا ہے۔

اسی معاملے پر تفتیشی حکام نے گزشتہ روز اسلم کے پورے دن کا ڈیٹا حاصل کرلیا ہے، کال ریکارڈ ڈیٹا کی مدد سے جاں بحق کارکن کی لوکیشن کو ٹریس کیا گیاہے۔

تفتیشی حکام کے مطابق گزشتہ روز ایک بج کر 42 منٹ پر اسلم اپنے گھر پر تھا، 5 بج کر 10 منٹ پر اسلم شارع فیصل احتجاج میں پہنچا،6بج کر32منٹ پراسلم کی لوکیشن پریس کلب کی آئی، اسلم پریس کلب پر7بج کر54منٹ تک موجودرہا۔

یہ بھی پڑھیں: وزیراعظم کا ایم کیوایم کے پُرامن مظاہرے پر سندھ پولیس کے تشدد کا نوٹس

تفتیشی حکام کے مطابق ساڑھے 6 بجے پولیس ایکشن شروع ہوا تب اسلم پریس کلب پر تھا، 8بج کر19 منٹ پرلوکیشن راشد منہاس روڈ کی آئی جوممکنہ طورپر واپسی کی تھی۔

حکام کے مطابق اسلم کوساڑھے 8 بجے اسپتال لایا گیا ،رات 10 بج کر 29 منٹ پر انتقال ہوا،رات 10 بج کر 33 منٹ پر موبائل لوکیشن گھر کی آئی جب میت گھر لے جائی چکی تھی۔

دوسری جانب ایم کیو ایم پاکستان کےکارکن محمد اسلم کی نمازجنازہ ادا کردی گئی ہے، نمازجنازہ صاحبزادہ جمیل راٹھور نے پڑھائی، جس میں خالدمقبول، فاروق ستار سمیت ایم کیوایم رابطہ کمیٹی اراکین اور کارکنان نے کثیر تعداد میں شرکت کی۔

Comments

یہ بھی پڑھیں