لندن: برطانیہ کی ملکہ الزبتھ دوم نے اپنی تخت نشینی کے 70 سال مکمل ہونے پر ایک بار پھر یہ واضح کردیا ہے کہ ان کے بعد شہزادہ چارلس ملک کے بادشاہ اور ان کی اہلیہ کمیلا پارکر ملکہ ہوں گی۔
برطانوی نشریاتی ادارے کی رپورٹ کے مطابق ملکہ الزبتھ دوم کی تخت نشینی کے 70 سال مکمل ہوگئے ہیں، یہ برطانیہ میں کسی بھی بادشاہ یا ملکہ کے عہد کا سب سے طویل عرصہ ہے۔
اس تاریخی دن پر ملکہ نے ایک اہم اعلان بھی کیا ہے۔
ملکہ نے اپنی تخت نشینی کی 70 ویں سالگرہ کے موقع پر ایک پیغام جاری کیا ہے جس میں انہوں نے اپنے اہل خانہ اور برطانوی عوام کا شکریہ ادا کیا ہے۔
انہوں نے یہ بھی کہا کہ ان کے بعد ملک کے آئندہ بادشاہ ان کے بیٹے شہزادہ چارلس ہوں گے اور برطانیہ کی نئی ملکہ، شہزادہ چارلس کی اہلیہ کمیلا پارکر ہوں گی، اور یہ دونوں اپنی شاہی ذمہ داریاں بخوبی نبھائیں گے۔
ملکہ کے فرمان اور شاہی قوانین کے مطابق شہزادہ چارلس کے بادشاہ بننے کے بعد کمیلا پارکر کوئین کنسورٹ بنیں گی، کوئین کنسورٹ کا خطاب بادشاہ کی شریک حیات کے لیے مختص ہے۔
ملکہ برطانیہ نے ڈچز آف کارنیوال یعنی کمیلا پارکر کے مستقبل کی ملکہ بننے کی یقین دہانی کرواتے ہوئے اس حوالے سے تمام ابہام کا خاتمہ کردیا ہے۔
اس سے قبل برطانوی میڈیا اور عوام میں مستقل یہ قیاس آرائیاں جاری تھیں کہ ولی عہد شہزادہ چارلس کے بادشاہ بننے کے بعد ان کی اہلیہ کو ملکہ کا خطاب نہیں دیا جائے گا۔
یہ بھی کہا جارہا تھا کہ ملکہ اپنے بعد، بیٹے چارلس کے بجائے پوتے شہزادہ ولیم کو بادشاہ نامزد کرسکتی ہیں، تاہم اب اس حوالے سے تمام قیاس آرائیاں دم توڑ گئی ہیں۔
