The news is by your side.

Advertisement

سدھو موسے والا کے قتل کے پیچھے کون تھا ؟ اعتراف سامنے آگیا

بھارتی سکھ گلوکار سدھو موسے والا کے قتل کی ذمہ داری کینیڈین گینگسٹر نے قبول کرلی، ملزمان کا کہنا ہے کہ وہ ہمارے خلاف کام کر رہا تھا۔

سماجی رابطے کی ویب سائٹ فیس بک پر کینیڈا میں مقیم گینگسٹر ستیندر سنگھ عرف گولڈی برار نے اس واقعے کے حوالے سے ایک بیان جاری کیا ہے۔

سوشل میڈیا پر پوسٹ کیے گئے بیان میں برار نے کہا کہ وہ لارنس بشنوئی گینگ کے ساتھ مل کر گلوکار سدھو موسے والا کے قتل کا ذمہ دار ہے۔

برار نے اپنے بیان میں کہا ہے کہ اس کا نام ہمارے بھائی وکی مڈوکھیرا گرلال برار کے قتل کیس میں تھا لیکن پولیس نے اس کیخلاف کوئی کارروائی نہیں کی، ہمارے بھائی انکیت بھاڈو کے انکاؤنٹر کے پیچھے بھی اسی کا ہاتھ تھا۔

اس کا کہنا ہے کہ دہلی پولیس نے گلوکار کا نام میڈیا کے سامنے رکھا تھا لیکن پھر بھی وہ اپنی طاقت کا استعمال کر کے سزا سے بچ گیا تھا اور اس کے خلاف کوئی کارروائی نہیں کی جارہی تھی وہ ہمارے خلاف کام کررہا تھا۔

دوسری جانب عام آدمی پارٹی کے سربراہ اور نئی دہلی کے وزیراعلیٰ اروند کیجریوال نے ٹویٹر پر مقتول کے لواحقین کو یقین دلایا کہ موسے والا کے قاتلوں کو سخت سزا دی جائے گی۔

مزید پڑھیں : مشہور نوجوان بھارتی گلوکار کو قتل کردیا گیا

انہوں نے کہا کہ سدھو موسی والا کا قتل انتہائی افسوسناک واقعہ ہے۔ میں نے ابھی پنجاب کے وزیراعلیٰ سے بات کی ہے۔ مجرموں کو سخت سے سخت سزا دی جائے گی۔ میں سب سے درخواست کرتا ہوں کہ وہ پرسکون رہیں اور امن کو برقرار رکھیں، خدا سدھو موسی والا کی روح کو سکون دے۔

Comments

یہ بھی پڑھیں