The news is by your side.

Advertisement

اپنے وجود اور انا کے لیے ملک دو لخت کروا دیا گیا: کیپٹن صفدر

اسلام آباد: سابق وزیر اعظم نواز شریف کے داماد کیپٹن ریٹائرڈ صفدر کہتے ہیں کہ واجد ضیا نے سب کچھ سیاہ کر دیا۔ کسی کو ریاست کی فکر نہیں، آئین توڑنے کی سازشیں ہوئیں، اپنے وجود اور انا کے لیے ملک دو لخت کروا دیا گیا۔

تفصیلات کے مطابق شریف خاندان کی احتساب عدالت میں پیشی کے موقع پر سابق وزیر اعظم نواز شریف کے داماد کیپٹن ریٹائرڈ صفدر نے میڈیا سے گفتگو کرتے ہوئے کہا کہ بڑے بڑے پروڈیوسر ہیں جنہوں نے پاکستان توڑ کر بھی جشن منایا۔ اپنا وجود برقرار رکھنے کے لیے 70 کی دہائی میں الیکشن نتائج تسلیم نہیں کیے گئے۔

انہوں نے کہا کہ ریاست کی کسی کو فکر نہیں، آئین توڑنے کی سازشیں ہوئیں۔ ’پہلے واجد ضیا دور میں پیش ہوتے تھے آج کل واجد سیاہ کے طور پر پیش ہو رہے ہیں۔ ان کو آئینہ دکھانے کا وقت آگیا ہے‘۔

کیپٹن صفدر نےمزید کہا کہ ایسی جے آئی ٹی بنی جس کا آئین و قانون میں کوئی وجود نہیں۔ جے آئی ٹی کا سیاسی وجود نظر آگیا ہے کہ اس کے پیچھے کیا مقاصد تھے۔ ’لوگ رانا بھگوان داس کے انصاف کو یاد کر رہے ہیں‘۔

انہوں نے کہا کہ سینیٹ میں ایسے لوگوں کو بٹھادیا گیا ہے جن کو گھر والےبھی نہیں جانتے۔ ’ماضی میں آئین توڑا گیا ایل ایف او آیا، پی سی او کے تحت حلف لیے گئے۔ پی سی او کے تحت حلف لینے کا مطلب ہے آئین پر عدم اعتماد ہے‘۔

کیپٹن صفدر نے کہا کہ کسی وزیر اعظم کو کام نہیں کرنے دیا جاتا۔ ابھی وزیر اعظم پرائم منسٹر ہاؤس پہنچتا ہے کہ اگلے دن اسے کہتے ہیں سامان پیک کرو اور واپس جاؤ۔ وزیر اعظم حلف لیتا ہے اور دوسرے دن امپائر کنٹینرز سجا دیتا ہے۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

Comments

comments

یہ بھی پڑھیں