بیجنگ : چین میں تفریح کیلئے آنے والا خاندان موت کے منہ میں جانے سے بال بال بچ گیا، گہری کھائی کے قریب کھڑی کار سلپ ہو کر نیچے جا گری۔
چین کے صوبے سنکیانگ کے ڈکو ہائی وے پر ایک خاندان تفریح کے غرض سے جا رہا تھا کہ راستے میں ایک مقام پر اپنی کار پارک کی، مذکورہ جگہ ایک کھائی کے قریب تھی۔
کار میں موجود خاتون ڈرائیور نے ابھی اپنی سیٹ بیلٹ بھی انہیں کھولی تھی کہ کار آہستہ آہستہ ڈھلان کی جانب سرکنے لگی اور باوجود کوشش کے وہ اسے نہیں روک پائی۔
اسی شش و پنج میں کار کی پچھلی سیٹ پر موجود دو افراد تیزی سے اتر گئے لیکن ڈرائیونگ سیٹ پر بیٹھی خاتون سیٹ بیلٹ نہیں کھول پائی اور گاڑی تیز رفتاری سے نیچے جا گری۔
غیر ملکی خبر رساں ادارے کی رپورٹ کے مطابق دی ہیجنگ کاؤنٹی ایمرجنسی مینجمنٹ بیورو نے بتایا ہے کہ واقعے میں کوئی جانی نقصان نہیں ہوا، بعد ازاں کار میں موجود خاتون کو نکال لیا گیا تاہم گرنے کے باعث انہیں شدید چوٹیں آئیں۔
واقعے کی خوفناک ویڈیو سوشل میڈیا پر وائرل ہوگئی، ابھی تک یہ معلوم نہیں ہوسکا ہے کہ آیا ہینڈ بریک میں کوئی خرابی تھی جس کی وجہ سے حادثہ رونما ہوا۔
واضح رہے کہ یہ ویڈیو ایک ایسے وقت میں سامنے آئی ہے جب چین میں کورونا لاک ڈاؤن کی پابندیوں میں نرمی کی گئی تھی لیکن اکثر معاملات میں اضافے کی وجہ سے اسے پابندیاں دوبارہ عائد کر دی گئی ہیں۔
علاوہ ازیں اس وقت چین میں ڈیلٹا ویرئینٹ کے کیسز میں بھی اضافہ ہو رہا ہے۔ بیجنگ سمیت کئی شہروں میں کورونا ٹیسٹنگ میں اضافہ کر دیا گیا ہے۔ کیسز میں اضافے کو روکنے کے لیے ملک میں لاک ڈاؤن نافذ کیا جا رہا ہے۔
اتنا ہی نہیں نقل و حمل کے تمام راستوں کو ان شہروں سے منقطع کردیا گیا ہے جہاں کوویڈ19 کے مثبت کیسز ہیں۔ تمام شہریوں کو متنبہ کیا گیا ہے کہ وہ اب صرف ضروری کام کے سلسلے میں ہی گھروں سے باہر نکلیں۔
