لاہور : نگراں وزیراعلیٰ پنجاب کے تقرر کے لئے پارلیمانی کمیٹی کے قیام کا نوٹیفکیشن جاری کردیا گیا ، کمیٹی میں حکومت اور اپوزیشن کے 3،3ممبران شامل ہیں۔
تفصیلات کے مطابق اسپیکرسبطین خان نے پارلیمانی کمیٹی کےقیام کانوٹیفکیشن جاری کردیا ہے۔
نوٹیفکیشن میں کہا گیا ہے کہ پارلیمانی کمیٹی نگراں وزیراعلیٰ پنجاب کا تقرر تین دن میں کرے گی، کمیٹی میں حکومت اور اپوزیشن کے 3،3ممبران شامل ہیں۔
نوٹیفکیشن کے مطابق حکومت کی جانب سے میاں اسلم اقبال،بشارت راجہ ، مخدوم ہاشم جواں بخت اور اپوزیشن کی جانب سے ملک احمد خان ، حسن مرتضیٰ ، ملک ندیم کامران ممبران میں شامل ہیں۔
گذشتہ روز اسپیکر پنجاب اسمبلی سبطین خان کا کہنا تھا کہ نگراں وزیراعلیٰ کیلئے اپوزیشن نےپارلیمانی کمیٹی کیلئے ابھی تک نام نہیں دیئے۔۔۔اتفاق نہ ہوا تو نگراں وزیر اعلیٰ کےتقررکیلئےنام الیکشن کمیشن کوبھجوادیں گے، کوشش ہےیہ معاملہ سیاسی طریقے سے ہی حل ہو۔
سبطین خان نے کہا کہ نگراں وزیراعلیٰ کیلئے نام کمیٹی میں آ جائیں توپھراس میں تبدیلی نہیں کی جاسکتی، اسپیکر قومی اسمبلی بادشاہ ہیں، مغلیہ دورہےجومرضی کریں۔
خیال رہے اگر کمیٹی نگراں وزیراعلیٰ پنجاب کے تقرر کا فیصلہ نہ کرسکی تو معاملہ الیکشن کمیشن میں چلا جائے گا۔
