واشنگٹن : امریکی صدر ڈونلڈ ٹرمپ نے چین کو جان لیوا کرونا وائرس کیخلاف مدد کی پیشکش کردی اور کہا چین سے مسلسل رابطے میں ہیں اور اس معاملے کو غور سے دیکھ رہے ہیں۔
تفصیلات کے مطابق امریکی صدر ڈونلڈ ٹرمپ نے سماجی رابطے کی ویب سائٹ ٹویٹر پر جاری ایک پیغام میں چین کو مدد کی پیشکش کرتے ہوئے کہا کہ کرونا وائرس سے نمٹنے کیلئے چین سے مسلسل رابطے میں ہیں، ہم نے چین اور صدر شی کو کسی بھی مدد کی پیش کش کی ہے۔
We are in very close communication with China concerning the virus. Very few cases reported in USA, but strongly on watch. We have offered China and President Xi any help that is necessary. Our experts are extraordinary!
— Donald J. Trump (@realDonaldTrump) January 27, 2020
امریکی صدر کا کہنا تھا کہ ہمارے ماہرین غیر معمولی صلاحیتوں کے حامل ہیں، کرونا وائرس کے امریکا میں بہت کم کیسز رپورٹ ہوئے ہیں، لیکن پھر بھی ہم اس معاملے کو غور سے دیکھ رہے ہیں۔
خیال رہے امریکہ میں اب تک پانچ افراد میں کرونا وائرس کی تصدیق ہوئی ہے اور حکام نے مزید 100 افراد کے ٹیسٹ کرنے کا عندیہ دیا ہے۔ حکام نے خدشہ ظاہر کیا ہے کہ آنے والے دنوں میں کورونا وائرس کے مزید کیسز سامنے آ سکتے ہیں۔
مزید پڑھیں : چین میں کرونا وائرس سے اموات کی تعداد 106 ہو گئی
یاد رہے چین کروناوائرس کی زدمیں ہے، وائرس سے اب تک 106 افرادہلاک جبکہ 4000 سےزائدافراد میں وائرس کی تصدیق ہوئی ہے، چین میں ہائی الرٹ ہے اور مختلف شہروں میں لاک ڈاون کردیا گیا ہے جبکہ ووہان میں ہنگامی بنیاد پر نئے ہسپتال کی تعمیر کا کام شروع کر دیا ہے۔
چین کے نئے قمری سال کے پہلے دن بیجنگ اور ہانگ کانگ سمیت بڑے شہروں میں تقریبات منسوخ کر دی گئیں ہیں جبکہ ہانگ کانگ میں ایمرجنسی نافذ کر دی گئی ہے، ہانگ کانگ کا کہنا ہے کہ چین کے لئے فیری،ریل سروس معطل کرے گا۔
دنیا بھر کے متعدد ایرپورٹس پر وائرس کو پھیلنے سے روکنے کیلئے مسافروں کی اسکریننگ کی جارہی ہے ۔
