The news is by your side.

Advertisement

جعلی ایس ایچ او کی گھر میں گھس کر خاتون سے بدتمیزی، مقدمہ درج

کراچی: شہر قائد کے علاقے گزری میں ایک شخص نے خود کو ایس ایچ او بتاتے ہوئے گھر میں گھس کر خاتون خانہ سے بدتمیزی کی، تاہم کچھ ہی دیر میں اسے بھاگنا پڑا۔

اے آر وائی نیوز کے مطابق مبینہ جعلی ایس ایچ او گزری بن کر خاتون کو ہراساں کرنے کے معاملے میں گلشن تھانے میں اجنبی شخص کے خلاف مقدمہ درج کر لیا گیا۔

خاتون نے اپنے بیان میں کہا کہ گزشتہ شب ساڑھے 11 بجے ایک شخص گھر پر آیا، اس نے اپنا تعارف ایس ایچ او گزری کی حیثیت سے کرایا اور وہ نامعلوم شخص گھر میں زبردستی داخل ہوگیا۔

خاتون کا کہنا تھا کہ انھوں نے اجنبی شخص کو روکا تو اس نے طیش دکھا کر دھکے دیے اور تھپڑ بھی مارا، نامعلوم شخص کے پاس اسلحہ بھی تھا جس سے وہ دھمکاتا رہا۔

خاتون کے بیان کے مطابق گھر میں زبردستی گھسنے والے شخص نے کہا میں ایس ایچ او ہوں، اور گرفتار کرنے اور پولیس موبائل بلانے کی دھمکیاں دیں۔

تاہم خاتون خانہ موبائل فون نکال کر اس کی فوٹیج بنانے لگیں تو یہ دیکھ کر وہ شخص فرار ہو گیا، پولیس کا کہنا ہے کہ ہراساں اور دھمکیاں دینے کی دفعات کے تحت نامعلوم شخص کے خلاف مقدمہ درج کر لیا گیا ہے۔

Comments

یہ بھی پڑھیں