کھانسی جسم سے نکلنے والی ایک ایسی آواز ہے جو پھیپھڑوں، بڑی سانس کی نالیوں، اور گلے میں جمع ہونے والے مواد یاگلے میں خراش کا باعث بننے والے مواد کو فطری انداز سے صاف کرتی ہے۔
کھانسی پھیپھڑوں اور سانس کی نالیوں کو صاف کرنے کیلئے جسم کا قدرتی طریقہ ہے اور یہ پھیپھڑوں میں ہوا کے علاوہ دیگر مواد کو داخل ہونے سے روکتی ہے، کھانسی کو اس حوالے سے اپنا کام کرنے دینا چاہیئے۔
اس حوالے سے اے آر وائی نیوز کے پروگرام باخبر سویرا میں حکیم شاہ نذیر نے کھانسی اور اس کی وجوہات کے بارے میں ناظرین کو آگاہ کیا۔
انہوں نے بتایا کہ کھانسی کی آواز سے ہی پتہ چل جاتا ہے کہ یہ گیلی، خشک، یا بری آواز والی کھانسی ہے، اس سے یہ بھی بتایا جا سکتا ہے کہ یہ کتنے عرصے تک رہے گی۔
ان کا کہنا تھا کہ کھانسی کی مختلف اقسام ہوتی ہیں جس میں نزلہ اور کھانسی ساتھ ہوتے ہیں دوسری صورت میں کھانسی کے دوران سانس بھی پھولتا ہے، اس کے علاوہ جو وہ کھانسی جو موسم کی تبدیلی کی وجہ سے ہوتی ہے اس میں نزلہ سر میں جم جاتا ہے۔
حکیم شاہ نذیر نے کھانسی کے علاج کا آسان نسخہ بتاتے ہوئے کہا کہ جوشاندہ ٹائپ کا قہوہ اس کیلئے بے حد مفید ہے اس کیلئے بانسہ کے پتے اور تخم ختمی ان کے سفوف کے آدھے آدھے چمچ سواکپ پانی میں جوش دے کر پیئیں گے تو بہت افاقہ ہوگا۔
ان کا کہنا تھا کہ ایسی کھانسی جس کا دورانیہ 2 ہفتے سے کم ہو شدید نوعیت کی کھانسی خیال کی جاتی ہے اور4 ہفتے سے زیادہ دیر تک رہنے والی کھانسی پرانی کھانسی کہلاتی ہے جس کیلئے اپنے ڈاکٹر یا حکیم سے فوری رابطہ کریں۔
