پیرس(14 ستمبر 2026): عالمی شہرت یافتہ کینیڈین گلوکارہ سیلین ڈیون نے طویل چھ سال بعد پیرس میں ایک مکمل لائیو کنسرٹ کے ساتھ اسٹیج پر شاندار واپسی کی ہے۔
اٹھاون سالہ گلوکارہ نے تیس ہزار پرجوش شائقین کے سامنے اپنے فن کا مظاہرہ کرتے ہوئے پچیس گانے پیش کیے، جن میں ان کا دنیا بھر میں مشہور گانا "مائی ہارٹ وِل گو آن” بھی شامل تھا۔
طویل عرصے تک اسٹیج سے دور رہنے کے بعد شاندار واپسی پر مداحوں کا پرجوش استقبال دیکھ کر سیلین ڈیون جذبات پر قابو نہ رکھ سکیں اور آبدیدہ ہو گئیں۔
واضح رہے کہ سیلین ڈیون ‘اسٹیف پرسن سنڈروم’ نامی ایک نایاب اعصابی بیماری میں مبتلا تھیں، جس کے باعث انہیں پٹھوں میں شدید اکڑاؤ اور اینٹھن کا سامنا کرنا پڑا تھا اور ان کی گائیکی اور آواز بھی شدید متاثر ہوئی تھی۔
بیماری پر قابو پانے کے بعد ان کی یہ واپسی موسیقی کی دنیا میں ایک بڑا اور تاریخی سنگ میل سمجھی جا رہی ہے۔
