اسلام آباد (20 ستمبر 2025): ملک سے سیمنٹ کی برآمدات (Export) میں رواں مالی سال کے پہلے 2 ماہ میں سالانہ بنیادوں پر نمایاں اضافہ ریکارڈ کیا گیا۔
سرکاری خبر رساں ادارے اے پی پی کے مطابق پاکستان کے ادارہ برائے شماریات (پی بی ایس) کے اعداد و شمار کے مطابق رواں مالی سال کے پہلے 2 ماہ میں سیمنٹ کی برآمدات سے ملک کو 72.71 ملین ڈالر زرمبادلہ حاصل ہوا جو گزشتہ مالی سال کی اسی مدت کے مقابلہ میں 98.11 فیصد زیادہ ہے۔
گزشتہ مالی سال کی اسی مدت میں اس کی برآمدات سے ملک کو 36.70 ملین ڈالر زرمبادلہ حاصل ہوا تھا۔
مقداری لحاظ سے مالی سال کے پہلے دو ماہ میں 1860636 میٹرک ٹن سیمنٹ کی برآمدات ریکارڈ کی گئیں جو گزشتہ مالی سال کی اسی مدت کے 992073 میٹرک ٹن کے مقابلہ میں 87.55 فیصد زیادہ ہے۔
اگست میں اس کی برآمدات سے ملک کو 79.37 ملین ڈالر زرمبادلہ حاصل ہوا جو گزشتہ سال اگست کے 22.21 ملین ڈالر کے مقابلہ میں 70.13 فیصد زیادہ ہے۔
جولائی کے مقابلہ میں اگست میں سیمنٹ کی برآمدات میں ماہانہ بنیادوں پر 8.21 فیصد اضافہ ہوا ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں