The news is by your side.

Advertisement

امریکا کے لئے براہ راست پروازیں جلد شروع کی جائیں گی، ایئر مارشل ارشد ملک

کراچی : پی آئی اے کے سی ای او ایئر مارشل ارشد ملک نے کہا ہے کہ امریکی سیکیورٹی ایجنسی کی کلیئرنس ملتے ہی پی آئی اے امریکا کے لئے براہ راست پروازیں شروع کردے گا، ادارے سے کسی ملازم کو نہیں نکالا جارہا۔

یہ بات انہوں نے کراچی میں پی آئی اے کے جدید ریزرویشن سسٹم (ہٹ اٹ) کی سالانہ تقریب سے خطاب کرتے ہوئے کہی، ایئر مارشل ارشد ملک نے کہا کہ پاکستان سے امریکا کے لئے براہ راست پروازیں شروع کرنے کے لئے امریکی سیکیورٹی کلیئرنس کا انتظار ہے۔

 تقریب سے خطاب میں سی ای او ایئرمارشل ارشد ملک کا کہنا تھا کہ امریکی سیکیورٹی ایجنسی ٹی ایس اے کا دورہ پاکستان کامیاب تھا، پی آئی اے میں نئے جدید ہٹ اٹ ریزرویشن سسٹم سے ادارے کی آمدنی میں اضافہ ہوا ہے۔

امریکی ٹرانسپورٹ سیکیورٹی کا وفد جلد پاکستان کا دوسرا دورہ کرے گا، سیکیورٹی کلیئرنس ملتے ہی پی آئی اے امریکا کے لئے براہ راست پروازیں شروع کردے گا۔

ایئرمارشل ارشد ملک کا مزید کہنا تھا کہ ماضی میں ادارے کو کافی حد تک مالی نقصان پہنچایا گیا، کرپشن میں ملوث عناصر کا کڑا احتساب کیا جارہا ہے، پی آئی اے ہیڈ آفس اسلام آباد منتقل نہیں ہورہا اور نہ ہی ڈاون سائزنگ ہورہی ہے۔

بعد ازاں پی آئی اے کے سی ای او ایئر مارشل ارشد ملک نے میڈیا سے گفتگو کرتے ہوئے کہا کہ پی آئی اے کا مالی خسارہ اربوں روپے کا ہے مسائل کو حل کرنے کے لیے وقت لگے گا۔ ملازمین کو تنخواہوں کی ادائیگی اور پی ایس او کو تیل سپلائی کی مد میں ادائیگی تاخیر کا شکار ہو رہی ہے، قومی ائیر لائن کو خسارے سے نکالنے کے لیے نئے جہاز درکار ہیں۔

انہوں نے مزید کہا کہ نئے جہازوں کی خریداری کے لیے حکومت کی مدد درکار ہے لیکن معاشی صورت حال میں حکومت مدد کرنے سے قاصر ہے، قومی ائیر لائن کا فضائی آپریشن کا 70 فیصد حصہ اسلام آباد منتقل ہو جانے کے باعث درکار تعداد میں ملازمین کو اسلام آباد منتقل کیا گیا ہے، تاہم پی آئی اے ہیڈ آفس اسلام آباد شفٹ نہیں ہو رہا۔

انہوں نے واضح کیا کہ قومی ائیر لائن کے کسی بھی ملازم کو نکالا نہیں جا رہا لیکن کرپٹ عناصر کو کسی صورت برداشت نہیں کیا جائے گا، پی آئی اے کی گزشتہ منجمنٹ نے سالانہ مالی نتائج کی رپورٹ بھی نہیں بنائی۔

Comments

comments

یہ بھی پڑھیں