The news is by your side.

Advertisement

پی آئی اے نے ملک میں کھیلوں کے فروغ میں اپنا کردار بخوبی نبھایا، ایئر مارشل ارشد ملک

کراچی : پی آئی اے کے چیف ایگزیکٹو آفیسر ایئرمارشل ارشد ملک نے کہا کہ پی آئی اے نے ہمیشہ ملک میں کھیلوں اور خاص طور پر کرکٹ کے فروغ میں اپنا کردار بخوبی نبھایا ہے۔

ان خیالات کا اظہار انہوں نے چیئرمین پی سی بی کی زیر قیادت وفد سے گفتگو کرتے ہوئے کیا، تفصیلات کے مطابق پاکستان کرکٹ بورڈ کے وفد نے چیئرمین احسان مانی کی قیادت میں پی آئی اے کے چیف ایگزیکٹو آفیسر ائر مارشل ارشد ملک سے ائر لائن ہیڈ آفس میں ملاقات کی۔

بورڈ کے چیئرمین احسان مانی نے پاکستان کرکٹ کی بہتری کے لئے کئے جانے والے اقدامات کے بارے میں آگاہ کیا۔ انہوں نے رواں کرکٹ سیزن قائد اعظم ٹرافی کے بارے میں بات کرتے ہوئے کہا کہ اندرون ملک کرکٹ کے فروغ اور اس میں بہتری کے لئے پی آئی اے اور پاکستان کرکٹ بورڈ مل کر کام کرسکتے ہیں جس کے کئی مواقع موجود ہیں۔

انہوں نے پی آئی اے کو پاکستان کرکٹ بورڈ کے شروع کئے گئے کرکٹ کے نئے ریجنل ڈھانچے کے فروغ کے لئے کردار ادا کرنے کو کہا۔

پاکستان کرکٹ بورڈ کے وفد نے دونوں قومی اداروں کے درمیان باہمی تعلقات کے فروغ پر زور دیا۔ پی آئی اے کے چیف ایگزیکٹو آفیسر ایئر مارشل ارشد ملک نے کہا کہ پی آئی اے نے ہمیشہ ملک میں کھیلوں اور خاص طور پر کرکٹ کے فروغ میں اپنا کردار بخوبی نبھایا ہے۔

پی آئی اے کرکٹ اکیڈمی میں نوجوان کرکٹرز کو تربیت دی جار ہی ہے جو کہ بعد میں بین الاقوامی سطح پربھی کرکٹ کھیل سکتے ہیں۔

انہوں نے کہا کہ دونوں قومی ادارے ملک کا فخر ہیں اور پی آئی اے اندرون ملک کرکٹ کے کے فروغ میں بھر پور تعاون کرے گی۔

کرکٹ بورڈ کے وفد میں چیف ایگزیکٹو آفیسر وسیم خان، چیف کمرشل آفیسر بابر حمید، ڈائریکٹر آپریشنز ہارون رشید جبکہ پی آئی اے کے ڈائریکٹر کارپوریٹ گورنس محمد شعیب اور چیف کمرشل آفیسر نوشیروان عادل بھی موجود تھے۔

Comments

comments

یہ بھی پڑھیں