کراچی : پی آئی اے کے صدر اور سی ای او ثاقب عزیز نے کہا ہے کہ پی آئی اے افسران حکومت کی کفایت شعاری مہم پر مکمل عمل درآمد کریں، غیر ضروری اخراجات میں کمی لانا ہوگی۔
یہ بات انہوں نے اجلاس سے خطاب کرتے ہوئے کہی، پی آئی اے کے صدر اور سی ای او ثاقب عزیز کی صدارت میں اہم اجلاس ہوا، اجلاس میں حکومت کی کفایت شعاری مہم پر مکمل طور پر عمل درآمد کرانے کی ہدایت کی گئی۔
پی آئی اے کے اجلاس کی اندرونی کہانی اے آروائی نیوز کو موصول ہوگئی، پی آئی اے کو منافع بخش ادارہ بنانے کیلئے غیر ضروری اخراجات میں کمی لانا ہوگی۔
سی ای او نے ہدایت کی کہ پی آئی اے کے گراونڈ ہونے والے چھ طیاروں کو فوری طور پر ان کی مینٹیننش مکمل کرکے اڑان کے قابل بنایا جائے،پی آئی اے کے سی ای او نے چیف کمرشل آفیسر اور چیف سسٹم آفیسر کو اندرون و بیرون ملک جانے سے روک دیا،۔
ذرائع کا کہنا ہے کہ جب تک پی آئی اے کا نیا ہیٹ ایٹ سسٹم کا پروجیکٹ مکمل نہیں ہوجاتا دونوں مذکورہ افسران پی آئی اے ہیڈ آفس چھوڑ کر کہیں نہیں جائیں گی۔
سی ای او ثاقب عزیز نے کہا کہ پی آئی اے کے طیاروں کو وقت پر روانگی اور آمد کو یقینی بنانے کیلئے ہنگامی بنیادوں پر اقدامات کئے جائیں، پی آئی اے کو خسارے سے نکالنے کیلئے تمام افسران ایک ٹیم ورک کی حیثیت سے اپنے فرائض انجام دیں اور مسافروں کو زیادہ سے زیادہ سہولت فراہم کی جائیں۔