گوجرانوالہ : پاکستان تحریک انصاف کے مرکزی صدر اور سابق وزیراعلیٰ پنجاب چوہدری پرویز الہیٰ کو کرپشن کے دونوں مقدمات سے بری کردیا گیا، عدالت نے محفوظ فیصلہ سنا دیا۔
تفصیلات کے مطابق چوہدری پرویزالٰہی کے خلاف گوجرانوالہ کی اینٹی کرپشن کی عدالت میں 2مقدمات کی سماعت ہوئی، گوجرانوالہ پولیس نے سابق وزیراعلیٰ پنجاب چوہدری پرویزالٰہی کو ريجنل اينٹی کرپشن ہيڈ کوارٹر سے لاکر ڈیوٹی جوڈیشل مجسٹریٹ محمد افضل کی عدالت میں پیش کیا تھا۔
محکمہ اینٹی کرپشن نے عدالت سے 14 روزہ جسمانی ریمانڈ طلب کیا، تاہم عدالت نے دلائل مکمل ہونے کے بعد فیصلہ محفوظ کرلیا تھا۔ عدالت نے وکلاء کے دلائل سننے کے بعد عدم ثبوت کی بناء پر پرویز الٰہی کو دونوں مقدمات میں بری کرنے کا حکم دیا۔
یاد رہے کہ عدالت میں پیشی کے موقع پر چوہدری پرویزالٰہی نے کمرہ عدالت میں اپنے وکلا سے گفتگو کرتے ہوئے کہا کہ مجھے تھانے میں رکھا گیا اور ادویات بھی نہیں دی گئیں، آج صبح کو بڑی مشکل سے ادویات لیں، مجھے باتھ روم بھی نہیں جانے دیا گیا۔
