جہانیاں : وزیراعلیٰ پنجاب چوہدری پرویزالٰہی نے کہا ہے کہ قوم کو قائد اعظمؒ کے بعد عمران خان جیسا بہادر لیڈر ملنے پر شکر گزار ہونا چاہیے، آئندہ انتخابات میں شکست ن لیگ کا مقدر ہوگی۔
یہ بات انہوں نے پنجاب کے شہر جہانیاں میں یاک بڑے جلسہ عام سے خطاب کرتے ہوئے کہی، اس سے قبل انہوں نے18کلومیٹر طویل تعمیر توسیع روڈ کے منصوبے کا افتتاح کیا۔
اپنے خطاب میں انہوں نے کہا کہ بہت جلد حلقہ پی پی209کے کچی آبادی کے مکینوں کو مالکانہ حقوق دئیے جائیں گے۔
وزیر اعلیٰ نے کہا کہ تحصیل ہیڈ کوارٹر کو150بیڈز پر اپ گریڈیشن اور بنیادی مرکز صحت میں ایک ایک ایمبولینس سروس فراہم کی جائیگی۔
پرویز الٰہی کا کہنا تھا کہ 12ایکڑ سے کم زمین والے تمام کسانوں کو ایک ایک سولر پینل فراہم کیا جائے گا وزیر اعلیٰ نے بہاؤالدین ذکریا یونیورسٹی کا سب کیمپس جہانیاں میں بنانے کا بھی اعلان کیا۔
جلسے سے خطاب کرتے ہوئے انہوں نے کہا کہ قوم کو قائد اعظمؒ کے بعد عمران خان جیسا لیڈر ملنے پر شکر گزار اور عمران خان کی صحت اور لمبی عمر کی دعائیں کرنی چاہیے۔
وزیراعلیٰ پنجاب کا مزید کہنا تھا کہ بہت جلد عمران خان کی قیادت میں پاکستان ترقی کی منازل تیزی سے طے کرے گا، آئندہ عام انتخابات میں مسلم لیگ ن شکست سے دوچار ہوگی۔
