The news is by your side.

Advertisement

پاکستان کو حکمران نہیں اللہ ہی چلارہا ہے، شجاعت حسین، پرویزالٰہی

گجرات : مسلم لیگ کے صدر چودھری شجاعت حسین اور پرویزالٰہی نے کہا ہے کہ اسلام اور پاکستان دشمنوں کے خلاف اتحاد کا عہد کیا جائے، وزیراعظم اور وزراء ملک سے باہر ہیں، پاکستا ن کو اللہ ہی چلارہا ہے۔

گجرات میں نماز عید کے بعد عید ملنے والوں اور میڈیا سے گفتگو کرتے ہوئے چودھری شجاعت حسین نے کہا کہ وزیراعظم اور وزراء تو پہلے ہی ملک سے باہر ہیں، پاکستان کو اللہ ہی چلارہاہے۔

ان کا کہنا تھا کہ حکمران خود تو شاپنگ کر رہے ہیں یہاں غریب پینشنر مارے مارے پھر رہے ہیں۔ چودھری پرویز الہٰی نے کہا کہ اللہ کریم ہمارے بزرگوں کی جدوجہد، قربانیوں اور دعاﺅں سے رمضان المبارک میں قائم ہونے والی اسلامی جمہوریہ پاکستان کی سلامتی و یکجہتی کی حفاظت کرے، اسے خوشحالی دے، بداَمنی، لوڈشیڈنگ اور دیگر بحرانوں سے نجات دلائے۔

انہوں نے پاکستان کیلئے جانیں قربان کرنیوالے پاک فوج، پولیس اور دیگر سکیورٹی فورسز کے افسروں، جوانوں اور شہریوں کو خراج عقیدت پیش کرتے ہوئے کہا کہ ہر پاکستانی ان کا ممنون ہے کیونکہ ان شہداءکی قربانیوں کی بدولت ہی آج ہم آزادی سے یہ تہوار منا رہے ہیں۔

انہوں نے بداَمنی کا شکار ہونیوالوں کے اہل خانہ سے دلی ہمدردی کا اظہار کرتے ہوئے کہا کہ قوم ان کے دکھ میں برابر کی شریک ہے، اللہ تعالیٰ امت مسلمہ اور ہمارے معاشرہ میں بداَمنی پیدا کرنیوالوں کو بھی اسلامی تعلیمات پر عمل کرنے کی توفیق دے اور ہماری اس مملکت خداداد کے تمام حصوں میں مکمل امن قائم ہو۔

عید کے موقع پر اپنے پیغام میں مسلم لیگی قائدین نے کہا کہ ہمیں آج شہداء کے خاندانوں کو یاد رکھنا چاہئے اور بیواﺅں، یتیموں کو عید کی خوشیوں میں شامل کریں۔

 

Print Friendly, PDF & Email

Comments

comments

یہ بھی پڑھیں