اسلام آباد: چیئرمین ایف بی آر ڈاکٹر اشفاق حسین نے کہا ہے کہ آئی ایم ایف پاکستانی ٹیکس سسٹم کی خرابیاں دور کرنا چاہتا ہے۔
تفصیلات کے مطابق چیئرمین ایف بی آر نے منی فنانس بل پر پریس کانفرنس میں واضح کیا کہ آئی ایم ایف کو معاشی نمبرز چاہئیں، وہ پاکستانی ٹیکس سسٹم کی خرابیوں کو دور کرنا چاہتے ہیں۔
ڈاکٹر اشفاق حسین نے پریس کانفرنس میں کہا کہ ہم جی ایس ٹی کو 17 فی صد پر لائے ہیں، فوڈ پراڈ کٹس کو محفوظ کیا، ٹیکس نہیں بڑھایا، ٹریکٹرز اور کھاد کو بھی ٹیکس سے بچایا ہے۔
چیئرمین ایف بی آر کا کہنا تھا کہ منی فنانس بل کے حوالے سے تکنیکی نکات بہت زیادہ ہیں، میڈیا میں اس حوالے سے جو خبریں چلیں ان میں حقیقت نہیں تھی، ضروری تھا کہ تکنیکی نکات پر میڈیا کو آگاہ کیا جاتا۔
اشفاق حسین نے کہا کہ آئی ایم ایف کوئی خوشی والی جگہ نہیں ہے مگر ایک حقیقت ہے، ہم اس کو تسلیم کرتے ہیں، اکتوبر میں آئی ایم ایف کے ساتھ ہمارے مذاکرات ہوئے تھے، آئی ایم ایف 700 ارب روپے کے نئے ٹیکس اقدامات چاہتا تھا لیکن ہم نے 343 ارب روپے کی رعایت ختم کرنے کی حامی بھری۔
چیئرمین ایف بی آر نے مزید کہا آئی ایم ایف نے ٹیکس وصولی بڑھانے پر زور دیا ہے، آئی ایم ایف پروگرام میں ہمیشہ سے ٹیکس نظام میں اصلاحات کا زور دیا گیا، اور ایف بی آر میں کسی بھی دور سے زیادہ اصلاحات کی گئیں، اس سلسلے میں پانچ قوانین میں ترامیم کی گئی ہیں۔
