اسلام آباد : چیئرمین نیب جسٹس (ر) جاوید اقبال نے عوامی شکایات کا نوٹس لیتے ہوئے کےالیکٹرک کے معاملے کی انکوائری کا حکم دے دیا اور کہا نیب کے الیکٹرک کو اووربلنگ سےمبینہ طو ر پر اربوں روپے ہتھیانے کی اجازت نہیں دے گی۔
تفصیلات کے مطابق چیئرمین نیب جسٹس (ر) جاوید اقبال نے کے الیکٹرک کے خلاف عوامی شکایات کا نوٹس لیتے ہوئے نیب کراچی کو کےالیکٹرک کے معاملے کی انکوائری کا حکم دے دیا۔
چیئرمین نیب نے حکومت پاکستان سے معاہدے کی مبینہ مکمل پاسداری نہ کرنے کی انکوائری کا بھی حکم دیتے ہوئے کہا بجلی نظام کو جدید خطوط پر استوار نہ کرنے کی انکوائری کی جائے۔
جسٹس (ر) جاوید اقبال نے نیب کراچی کو کے الیکٹرک سے معاہدے کی کاپی حاصل کرنے ، کےالیکٹرک سے متعلقہ دستاویز اور سرمایہ کاری کی تفصیلات لینے کی ہدایت کردی۔
چیئرمین نیب نے کہا کہ نیب بطور قومی ادارہ قانون کے مطابق فرائض سر انجام دینے پریقین رکھتاہے، نیب کے الیکٹرک کو اووربلنگ سےمبینہ طو ر پر اربوں روپے ہتھیانے اور غیراعلانیہ لوڈ شیڈنگ سمیت معاہدے کی پاسداری نہ کرنے کی اجازت نہیں دے گا۔
جسٹس (ر) جاوید اقبال نے کے الیکٹرک کے خلاف 3ماہ میں انکوائری مکمل کرنے کی ہدایت کرتے ہوئے کہا نیب بلاتفریق احتساب پر یقین رکھتا ہے۔
