چمن : مال روڈ پرزور دار دھماکے سے ایک بچہ جاں بحق اور بارہ افراد زخمی ہوگئے، دھماکا خیزمواد موٹرسائیکل میں نصب تھا۔دھماکےمیں ایک گاڑی اور6موٹرسائیکلیں مکمل طور پر تباہ ہوگئیں۔
تفصیلات کے مطابق بلوچستان کے سرحدی علاقے چمن میں مال روڈ پر زور دار دھماکہ ہوا ہے ، ڈپٹی کمشنر کا کہنا ہے کہ دھماکے سے ایک بچی بچہ جاں بحق اوربارہ افراد زخمی ہوئے ہیں۔
اس حوالے سے ریسکیو ذرائع کا کہنا ہے کہ دھماکا خیزمواد موٹرسائیکل میں نصب تھا، دھماکہ اس قدر شدید تھا کہ اس کی آواز دور دور تک سنی گئی، دھماکے کے بعد متعدد موٹرسائیکلوں میں آگ لگ گئی۔
اطلاع ملتے ہی امدادی ٹیمیں جائے وقوعہ پر پہنچ گئیں اور زخمیوں کو فوری طور پر مقامی اسپتال منتقل کردیا گیا، زخمیوں میں سے متعدد افراد کی حالت تشویشناک ہے، قانون نافذ کرنے والے اداروں نے جائے وقوعہ کو گھیرے میں لے کر تفتیش کا آغاز کردیا ہے۔
ریسکیو ذرائع کے مطابق دھماکے میں ایک گاڑی اور چھ موٹرسائیکلیں مکمل طور پر تباہ ہوگئیں، دھماکے سے درجنوں دکانوں کے شیشے بھی ٹوٹ گئے۔
مزید پڑھیں: کوئٹہ، ہزارگنجی فروٹ مارکیٹ کے قریب دھماکا ، 20 افراد جاں بحق، 48 زخمی
واضح رہے کہ آج صبح کوئٹہ میں ہزار گنجی فروٹ مارکیٹ کے قریب خود کش دھماکے کے نتیجے میں20افراد جاں بحق اور48زخمی ہوگئے تھے، دہشت گردی کا اندوہناک واقعہ اس وقت ہوا جب لوگ خریداری میں مصروف تھے۔
