site
stats
پاکستان

چمن: باب دوستی 22 روز کی بندش کے بعد کھول دیا گیا

چمن: صوبہ بلوچستان میں پاک افغان سرحد پر باب دوستی کو 22 روز کی بندش کے بعد کھول دیا گیا۔

پاک فوج کے شعبہ تعلقات عامہ آئی ایس پی آر کے مطابق چمن بارڈر پر باب دوستی کھول دیا گیا۔ آئی ایس پی آر کا کہنا ہے کہ باب دوستی افغان حکام کی درخواست پر کھولا گیا۔

آئی ایس پی آر کے مطابق باب دوستی کو ماہ رمضان کے احترام میں انسانی ہمدردی کی بنیاد پر کھولا گیا۔ چمن واقعے کے بعد پاکستان کا سرحد پر مکمل کنٹرول قائم ہے۔

پاک فوج کے مطابق دونوں جانب سے سرحد پر سیز فائر برقرار رکھنے اور دونوں جانب سے سرحدی خلاف ورزی نہ کرنے پر اتفاق ہوا ہے۔

واضح رہے کہ 5 مئی کو چمن کے گاؤں کلی لقمان، کلی جہانگیر میں افغان فورسز نے مردم شماری کی ٹیم پر فائرنگ اور گولہ باری کی تھی جس کے نتیجے میں 10 افراد شہید اور 45 زخمی ہوگئے تھے۔

افغان جارحیت کے بعد باب دوستی کو بند کردیا گیا تھا جس کے بعد نیٹو سپلائی اور افغان ٹرانزٹ ٹریڈ سمیت ہر قسم کی تجارتی سرگرمیاں اور پیدل آمد و رفت معطل ہوگئی تھی۔

مزید پڑھیں: پاک افغان فلیگ میٹنگ میں معاملے کے حل تک سیز فائر پر اتفاق

بعد ازاں پاک افغان سیکیورٹی حکام کے درمیان باب دوستی پر فلیگ میٹنگ بھی ہوئی جس میں دونوں جانب سے گوگل سروے میپ اور جیولوجیکل سروے میپ پر اتفاق کیا گیا۔

میٹنگ میں کہا گیا تھا کہ جغرافیائی سروے ماہرین صورتحال کا جائزہ لیں گے اور افغان فورسز کے نقشوں میں موجود فرق کو دور کیا جائے گا۔ سروے میں نقشوں کے ذریعے متنازع حدود کا تعین کیا جائے گا کیونکہ پاک افغان ٹیموں کے نقشوں میں واضح فرق نہیں۔


Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top