لندن : تحریک انصاف کے رہنما اور چوہدری وجاہت حسین کے صاحبزادے چوہدری حسین الٰہی نے بھی تحریک انصاف سے کنارا کشی کرلی۔
لندن میں پریس کانفرنس سے خطاب کرتے ہوئے حسین الہٰی نے پی ٹی آئی چھوڑ کر ق لیگ میں شمولیت کا اعلان کردیا۔
چوہدری حسین الٰہی نے کہا کہ 9مئی کو جو کچھ ہوا انتہائی ناقابل برداشت ہے، ہم تحریک انصاف کے ساتھ اتحاد ختم کرنے کا اعلان کرتے ہیں۔
انہوں نے کہا کہ اپنی پارٹی مسلم لیگ ق میں واپس جارہا ہوں، چوہدری شجاعت حسین ہمارے بڑے ہیں، ہمارے کچھ فیصلے وقت کے ساتھ غلط ثابت ہوئے۔
چوہدری حسین الٰہی کا مزید کہنا تھا کہ میرے والد مجھے سیاست میں لے کر آئے تھے ان کے ہر فیصلے کا پابند ہوں۔
واضح رہے کہ اس سے کچھ دیر قبل تحریک انصاف کے نائب صدر فواد چوہدری نے بھی پی ٹی آئی اور عمران خان سے علیحدگی کا اعلان کیا تھا۔
سماجی رابطے کی ویب سائٹ ٹوئٹرپر اپنے پیغام میں ان کا کہنا تھا کہ وہ سیاست سے بریک لے رہے ہیں۔
