کبھی خوشامد نہیں کی، نوازشریف کو بھی کہا تھا، خوشامدی مطلب پرست ہوتے ہیں: چوہدری نثار
The news is by your side.

Advertisement

کبھی خوشامد نہیں کی، نوازشریف کو بھی کہا تھا، خوشامدی مطلب پرست ہوتے ہیں: چوہدری نثار

گذشتہ 35 سال میں یہاں نوازشریف، زرداری یا عمران نہیں، صرف چوہدری نثار آیا ہے

راولپنڈی: سابق وفاقی وزیر داخلہ چوہدری نثار نے کہا ہے کہ کبھی کسی کی خوش آمد نہیں کی، نوازشریف کو بھی بتا دیا تھا کہ خوشامدی لوگ مطلب پرست ہوتے ہیں، میرا سر صرف اللہ کے سامنے جھکتا ہے۔

ان خیالات کا اظہار انھوں نے روات میں جلسے سے خطاب کرتے ہوئے کیا۔ انھوں نے کہا کہ ٹکٹ والا ہو یا بغیرٹکٹ والا، انشااللہ سب کو یہاں شکست فاش ہوگی، جو امیدوار میرے مدمقابل ہیں، یہ ان کاحلقہ ہی نہیں، مگر انھیں یہاں سے لڑایا جارہا ہے۔

چوہدری نثار کا کہنا تھا کہ اقتدار میں آکر حلقے کے لئے کام کیا، اپنی جیب نہیں بھری، کبھی اس علاقے میں بجلی اور سڑکیں نہیں تھیں۔

انھوں نے کہا کہ انسان ہوں، غلطیاں ہوتی ہیں، مگرجان بوجھ کر کوئی غلط کام نہیں کیا، مخالف کو بھی انتقام کا نشانہ نہیں بنایا، کبھی زبردستی ووٹ نہیں لیا۔

چوہدری نثار کا کہنا تھا کہ اقتدارمیں آکر فیکٹری یا پیٹرول پمپ نہیں بنایا، 8 بار قومی اسمبلی کا رکن بنا ہوں، ہمیشہ سر اٹھا کرسیاست کی، مجھ پر کسی قسم کی مشکل نہیں۔

انھوں نے مزید کہا کہ سیاست آسان کام نہیں، یہاں جھوٹ، کرپشن اور فریب ہے، میرے دامن پر گندگی کا کوئی داغ نہیں، میر ایمان ہے عزت عہدوں سےنہیں ملتی۔

ان کا کہنا تھا کہ ثابت ہوگیا، روات ہمیشہ کی طرح نثارکے ساتھ کھڑا ہے، 1985سے ہر الیکشن میں یہاں جلسہ ہوتا آیا ہے، مگر میری یادداشت کے مطابق اس مقام پراس سےبڑاجلسہ نہیں دیکھا، آپ کا جذبہ دیکھ کرمیرا حوصلہ بلند ہوا ہے۔

 انھوں نے کہا کہ گذشتہ 35 سال میں یہاں نوازشریف، زرداری یا عمران نہیں آیا، صرف ایک شخص آیا، وہ چوہدری نثار ہے، اسی سرزمین پربڑے بڑے برج الٹیں گے۔

دوران خطاب انھوں نے یہ دعویٰ بھی کیا کہ کراچی آپریشن نواز شریف نے نہیں، بلکہ انھوں نے شروع کیا۔


نوازشریف ہم سے زیادہ اہل اور سیاسی نہیں، نہ ہی میں ان کا مقروض ہوں، چوہدری نثار


خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں 

Comments

comments

یہ بھی پڑھیں