ملک میں سیاسی ہلچل جاری ہے اور اسلام آباد توجہ کا مرکز بنا ہوا ہے اسی تناظر میں چوہدری شجاعت اور آصف زرداری کی کل ملاقات ہوگی۔
ملک میں سیاسی ہلچل عروج پر پہنچ چکی ہے، اپوزیشن نے وزیراعظم کیخلاف تحریک عدم اعتماد قومی اسمبلی سیکریٹریٹ میں جمع کرادی ہے اور رابطوں میں بھی تیزی آگئی ہے، اس صورتحال میں چوہدری برادارن خصوصی اہمیت اختیار کرگئے ہیں، اور ق لیگ کے سربراہ چوہدری شجاعت طویل عرصے بعد منگل کے روز وفاقی دارالحکومت اسلام آباد پہنچے ہیں۔
اے آر وائی نیوز کے مطابق سابق صدر اور پی پی کے شریک چیئرمین آصف علی زرداری اور چوہدری شجاعت کے درمیان آج ملاقات ہوگی۔
ملاقات کے دوران موجودہ سیاسی صورتحال، وزیراعظم کے خلاف تحریک عدم اعتماد پر غورو خوض کیا جائیگا اور موجودہ سیاسی صورتحال میں حالیہ اقدامات اور مستقبل کی حکمت عملی پر بھی تبادلہ خیال ہوگا۔
اس سے قبل چوہدری شجاعت نے اسلام آباد میں مولانا فضل الرحمٰن سے بھی ملاقات کی تھی۔
مزید پڑھیں: چوہدری شجاعت کی مولانا فضل الرحمٰن کو بڑی ’’پیشکش‘‘
ذرائع کے مطابق اس ملاقات کے دوران چوہدری شجاعت نے مولانا فضل الرحمٰن کو منانے کی کوشش کی اور انہیں عدم اعتماد میں اپنے تعاون کی پیشکش بھی کی۔
ذرائع نے بتایا کہ مولانا فضل الرحمٰن نے فوری طور پر اس پیشکش کا کوئی جواب نہیں دیا اور کہا کہ اس معاملے پر دیگر اپوزیشن رہنماؤں سے مشاورت کی جائیگی۔
