The news is by your side.

Advertisement

بھارت میں ویکسین رکشہ بھی چلنے لگے

نئی دہلی : بھارتی فنکار نے کرونا ویکسینیشن سے متعلق آگاہی مہم چلانے کےلیے منفرد رکشہ تیار کرلیا۔

کرونا وائرس کی مہلک قسم ڈیلٹا اور بلیک فنگس نے بھارت میں بدترین تباہی مچا رکھی ہے جس کے باعث اب تک بھارت میں کروڑوں افراد متاثر اور لاکھوں ہلاک ہوچکے ہیں۔

پڑوسی ملک بھارت میں اب تک ساڑھے 6 کروڑ سے زائد افراد کی ویکسینیشن مکمل کی جاچکی ہے لیکن اس کے باوجود بھارت کی 95 فیصد آبادی کی مکمل ویکسینیشن ہونا باقی ہے۔

ویکسین سے اموات اور بلب جلنے جیسے مفروضے بھارت میں بھی گردش کررہے ہیں جس کی وجہ سے شہری ویکسین لگوانے کے بجائے دیگر طریقوں (گاؤ متر، آیوروید) سے علاج کرنے کی کوشش کررہے ہیں۔

عوام میں شعور اجاگر کرنے کےلیے بھارتی فنکار نے انوکھا رکشہ تیار کیا ہے جس کے ذریعے وہ ویکسین سے متعلق آگاہی مہم چلائیں گے۔

بھارتی ریاست چنئی سے تعلق رکھنے والے آرٹسٹ نے منفرد طرز سے رکشہ کو ڈیزائن کیا ہے کہ جسے دیکھ کر معلوم ہوتا ہے کہ جیسے رکشہ نہیں بلکہ کوئی ویکسین کی بوتل یا سرنج ہو۔

سوشل میڈیا پر وائرل ہونے والی تصاویر اور ویڈیوز میں دیکھا جاسکتا ہے کہ رکشے پر نیلے رنگ کا پینٹ کیا گیا ہے اس کے چاروں اطراف سرنجیں نکلی ہوئی ہیں جب کہ چھت پر کرونا ویکسین کی بڑی سی شیشی بھی بنائی گئی۔

بھارتی فنکار نے رکشے میں ساؤنڈ سسٹم بھی نصب کیا ہے جس کی مدد سے وہ اونچی آواز میں لوگوں کو کرونا وائرس کی ویکسین کے بارے میں اہم معلومات فراہم کرتا ہے۔

Comments

یہ بھی پڑھیں