The news is by your side.

Advertisement

بلی نے جان بچانے کے لیے جلتی عمارت کی پانچویں منزل سے چھلانگ لگا دی، ویڈیو وائرل

شکاگو: امریکی شہر شکاگو میں ایک جلتی عمارت کی پانچویں منزل سے بلی نے جان بچانے کے لیے اندھا دھند چھلانگ لگا دی، جس کی ویڈیو سوشل میڈیا پر دیکھتے ہی دیکھتے وائرل ہو گئی۔

تفصیلات کے مطابق جمعرات کو ریاست ایلی نوئے میں شکاگو کے فائر فائٹرز نے ایک ایسی ویڈیو شیئر کی ہے جسے دیکھ کر لوگ ششدر رہ گئے، اس ویڈیو میں بلی جان بچانے کے لیے عمارت کی پانچویں منزل سے بے دھڑک چھلانگ لگاتی دکھائی دے رہی ہے۔

کہا جاتا ہے کہ بلی کی نو جانیں ہوتی ہیں، آتش زدگی کی شکار عمارت سے اتنی بلندی سے چھلانگ لگانے کے لیے شاید بلی کو اپنی یہ ساری جانیں خرچ کرنی پڑی ہوں گی۔

ویڈیو میں دیکھا جا سکتا ہے کہ عمارت کی پانچویں منزل سے دھواں اٹھ رہا ہے اور ایک بلی کھڑکی سے بے دھڑک چھلانگ لگا رہی ہے، حیرت انگیز بات یہ ہے کہ بلی چھلانگ لگانے کے بعد بالکل سلامت رہی، اور اسے کوئی چوٹ نہیں آئی۔

مقامی حکام کا کہنا تھا کہ بلی چھلانگ لگانے کے بعد دوڑتی نظر آئی، اور اس نے واپس عمارت میں جانے کی بھی کوشش کی۔

یہ ویڈیو سوشل میڈیا پر جیسے ہی شیئر ہوئی، نہایت تیزی سے وائرل ہو گئی، لوگوں نے اس پر حیرت اور تعجب کا اظہار کرتے ہوئے طرح طرح کے تبصرے کیے، کسی نے بلی کو حیرت انگیز قرار دیا تو کسی نے اسے شیطان کی خالہ کہا۔

کالی بلیوں کو عام طور سے لوگ بد بختی کی علامت سمجھتے ہیں لیکن یہ والی کالی بلی تو بڑی خوش قسمت نکلی۔

واضح رہے کہ یہ ویڈیو اس وقت ریکارڈ ہوئی جب شکاگو فائر ڈیپارٹمنٹ کا عملہ آگ بجھانے کے دوران ویڈیو بنا رہا تھا، جب ٹوٹی کھڑکی سے نکلتے دھوئیں میں سے یہ بلی اچانک کھڑکی میں نمودار ہوئی۔

Comments

یہ بھی پڑھیں