The news is by your side.

Advertisement

چیف جسٹس ثاقب نثار کل اور پرسوں پشاور میں اہم مقدمات کی سماعت کریں گے

اسلام آباد: چیف جسٹس ثاقب نثار کل اور پرسوں پشاور میں اہم مقدمات کی سماعت کریں گے، خیبرپختونخوا کے اسپتالوں کا فضلہ ضائع کرنے سے متعلق کیس کی سماعت کل ہوگی۔

چیف جسٹس ثاقب نثار کے پی میں پرائمری اور سیکنڈری تعلیم سے متعلق کیس کی سماعت کل کریں گے، نجی میڈیکل کالجز میں داخلوں سے متعلق کیس کی سماعت بھی کل ہوگی۔

خیبر پختونخوا کے اسپتالوں کی ابتر صورتحال پر سماعت بھی کل کی جائے گی جبکہ فضائی آلودگی سے متعلق معاملہ جمعے کو سنا جائے گا، کے پی میں صاف پانی کی فراہمی پر سماعت جمعے کو ہوگی، نہروں اور دریاؤں میں صنعتی فضلہ سے متعلق سماعت جمعے کو کی جائے گی۔

دوسری جانب چیف جسٹس کی پشاور آمد کا سن کر پشاور کے سرکاری اسپتالوں کی انتظامیہ جاگ اٹھی ہے، چیف جسٹس کی آمد سے قبل ہی ہسپتالوں کا عملہ متحرک ہوگیا ہے اور صفائی زور و شور سے جاری ہیں۔

واضح رہے چند روز قبل محکمہ صحت خیبر پختونخوا نے چیف جسٹس ثاقب نثار کے متوقع دورہ پشاور کے موقع پر تمام بڑے ہسپتالوں کو مراسلے جاری کئے تھے، جس میں کہا گیا تھا کہ ملک کی اہم شخصیت کا دورہ متوقع ہے، ہسپتالوں میں ڈاکٹرز اور عملے کی حاضری کو یقینی بنایا جائے۔

خیال رہے کہ چیف جسٹس ثاقب نثار پنجاب، سندھ اور بلوچستان کے دورے کرچکے ہیں جہاں انہوں نے ہسپتالوں کا معائنہ کیا اور دستیاب سہولیات کے بارے میں بریفنگ لی تھی۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں