The news is by your side.

پوری قوم دہشت گردی کے خلاف جنگ میں ایک پیج پر ہے، وزیراعلیٰ سندھ

کراچی: وزیراعلیٰ سندھ سید مراد علی شاہ نے کہا ہے کہ پوری قوم دہشت گردی کے خلاف جنگ میں ایک پیج پر ہے، افواج پاکستان کو پوری قوم کی حمایت حاصل ہے۔

تفصیلات کے مطابق وزیراعلیٰ سندھ سید مراد علی شاہ نے کہا کہ آئیڈیاز 2018 کا کامیاب انعقاد ثبوت ہے کہ یہ پرامن ملک ہے، کامیاب نمائش کا انعقاد معاشی ترقی کے لیے بھی سود مند ہے، امن کے لیے ہر ادارے، ہر شہری کو اپنا فرض ادا کرنا ہوگا۔

وزیراعلیٰ سندھ نے کہا کہ پاک بحریہ کی بہترین کارکردگی سے گوادر بندرگاہ کو حقیقت کا روپ ملا، مسلح افواج کی کارکردگی اور ذمہ دارانہ صلاحیتوں پر سو فیصد یقین ہے۔

مراد علی شاہ نے کہا کہ پاکستان کئی دہائیوں سے دہشت گردی کے خلاف جنگ لڑ رہا ہے، دہشت گردوں نے ملکی امن، خوشحالی کو بہت حد تک متاثر کررکھا تھا، پاک افواج نے دہشت گردوں کو کیفر کردار تک پہنچایا، ہم نے دہشت گردوں کے خلاف بہت سے کامیاب آپریشن کیے۔

واضح رہے کہ آئیڈیاز 2018 نمائش میں پاک فضائیہ نے شاندار فضائی مظاہرہ کیا، فضائی مظاہرے میں تینوں مسلح افواج کے دستوں نے حصہ لیا، وزیراعلیٰ سندھ سید مراد علی شاہ ودیگر بھی اس موقع پر موجود تھے۔

سربراہ پاک فضائیہ کا کانفرنس سے خطاب

قبل ازیں سربراہ پاک فضائیہ ایئر چیف مارشل مجاہد انور خان نے کانفرنس سے خطاب کرتے ہوئے کہا کہ غیرملکی مہمانوں کے آنے پر دلی مسرت ہوئی ہے، پاک فضائیہ کے افسران نے آج کانفرنس میں شاندار بریفنگ دی۔

سربراہ پاک فضائیہ نے کہا کہ کانفرنس کے دوران ماہرین کی رائے اور تجربہ اہمیت کا حامل ہے، ہمارے ہددف ایئر اسپیس کی نگرانی کرنا ہے، چیلنجز کو شیئرنگ آئیڈیاز سے حل کرنے میں مدد مل سکتی ہے۔

ایئرچیف مارشل مجاہد انور خان نے کہا کہ ایوی ایشن انڈسٹری میں سرمایہ کاری کے بہت مواقع ہیں، ہمارا فوکس ریسرچ اینڈ ڈیولپمنٹ پر بھی ہے، ہمارا فوکس ایوی ایشن انڈسٹری پر بھی ہے۔

Comments

یہ بھی پڑھیں