The news is by your side.

Advertisement

چلی: چڑیا گھرنے خودکشی پرآمادہ شخص کو بچانے کے لیے دو شیرماردیے

سان تیاگو: چلی کے ایک چڑیا گھر کو 20 سال سے مقیم شیروں کو اس وقت گولی مارنا پڑی جب ایک شخص خودکشی کے ارادے سے شیروں کے پنجرے میں داخل ہوگیا ، اس منظر نے چڑیا گھر میں موجود عوام ششدر کرکے رکھ دیا۔

برطانوی خبر رساں کے مطابق چلی کے ایک چڑیا گھر میں ایک شخص بظاہر خودکشی کی نیت سے برہنہ حالت میں شیروں کے پنجرے داخل ہوگیا اور اس کو بچانے کے لیے حکام کو دو شیروں کو گولی مارنی پڑی۔

مذکورہ شخص کی عمر بیس سے تیس سال کے لگ بھگ ہے اور اسے شیروں نے حملہ کر کے شدید زخمی کردیا اور اس شخص کے بارے میں بتایا جا رہا ہے کہ وہ کسی ذہنی مرض کا شکار ہے۔

چلی کے شہر سان تیاگو میں واقع اس چڑیا گھر میں جس وقت یہ واقع پیش آیا اس وقت چڑیا گھر میں لوگوں کی بڑی تعداد موجود تھی جن میں سے بعض نے یہ سارا ماجرا اپنی آنکھوں دیکھا۔

جانوروں کے حقوق کے لیے کام کرنے والی تنظیموں کی جانب سے شیروں کو مارنے پر تنقید کی جا رہی ہے جبکہ چڑیا گھر کی انتظامیہ کا موقف ہے کہ ان کے پاس شیروں کو فوراً بہوش کرنے والی ادویات نہیں تھیں اور ان کے لیے انسانی زندگی کو بچانا زیادہ اہم تھا۔

سانتیاگو کے چڑیا گھر کی سربراہ مانتابیلا کا کہنا ہے کہ یہ شخص شیروں کے پنجرے میں چھت کے راستے داخل ہوا اور پھر اس نے اپنے کپڑے اتار دیے۔

مانتابیلا کے بقول ایسی صورتحال کے حوالے سے چڑیا گھر کے کچھ طے شدہ ضابطے ہیں اور ان ہی کے مطابق اس شخص کی جان بچانے کے لیے شیروں کو مارا گیا۔

ان کا مزید کہنا تھا کے مارے جانے والے شیروں میں ایک نر اور ایک مادہ تھی۔

مقامی میڈیا کے مطابق متاثرہ شخص کے کپڑوں سے ایک نوٹ ملا ہے جس میں اس شخص نے خود کشی کا ارادہ ظاہر کیا ہے۔

Comments

comments

یہ بھی پڑھیں