بیجنگ: چین نے قرضوں کے بوجھ تلے دبے پاکستان کے معاشی استحکام کیلیے عالمی برادری سے اپیل کر دی۔
چینی وزارت خارجہ کی ترجمان ماؤ ننگ نے ایک پریس کانفرنس کے دوران کہا کہ پاکستان کو قرضوں کے بحران سے نکالنے کیلیے عالمی برادری مدد کرے، قرض دینے والے ممالک پاکستان کی معاشی صورتحال میں مدد کریں، مالیاتی ادارے پاکستان کیلیے مثبت کردار ادا کریں، پاکستان کی معاشی اور سماجی ترقی میں سب کو تعمیری کردار ادا کرنا چاہیے۔
ترجمان نے کہا کہ چند امیر ممالک کی سخت اقتصادی پالیسیاں پاکستان جیسے ممالک کیلیے معاشی بحران کی بڑی وجہ ہیں، ان ممالک کی مالیاتی پالیسیاں پاکستان اور دیگر ممالک کی معاشی مشکلات بڑھا رہی ہیں۔
ماؤ ننگ کا کہنا تھا کہ چین اور پاکستان کے درمیان مضبوط شراکت داری ہے، معیشت سمیت مختلف شعبوں میں پاکستان کے استحکام کیلیے چین بھرپور تعاون جاری رکھے گا۔
یاد رہے کہ چین نے پاکستان اور آئی ایم ایف کے درمیان معاہدے سے قبل ہی پاکستان کو 70 کروڑ ڈالرز کا قرض فراہم کر دیا۔ جمعہ کے روز چائنا ڈیلوپمنٹ بینک سے اسٹیٹ بینک آف پاکستان کو 70 کروڑ ڈالرز موصول ہوئے۔
اسٹیٹ بینک پاکستان کا کہنا تھا کہ چینی قرض سے اسٹیٹ بینک کے زخائر میں اضافہ ہوگیا جو بڑھ کر 4 ارب ڈالر کے قریب پہنچ گئے۔
وزیر خزانہ اسحاق ڈار نے چند روز قبل بتایا تھا کہ چین کے ترقیاتی بینک سے 70 کروڑ ڈالرز کا معاہدہ طے پا چکا ہے۔
