نیویارک : اقوام متحدہ کی سلامتی کونسل نے شمالی کوریا کے میزائل پروگرام کےباعث اس پر نئی پابندیوں کی منظوری دے دی جس پر چین نے بھی اتفاق کیا ہے۔
تفصیلات کے مطابق شمالی کوریا کی جانب سے حالیہ میزائل تجربے کے بعد اقوامِ متحدہ کی سلامتی کونسل میں شمالی کوریا کی برآمدات کو محدود کرنے سے متعلق قراردار تسلیم کرلی گئی۔
خیال رہے کہ حال ہی میں جاپان، جنوبی کوریا اور امریکہ نے ان تجربات کی مذمت کی تھی جس کے بعد سلامتی کونسل نے نئی پابندیوں کے مسودے پر رائے شماری کی۔
چین کے سفیر لیو جیائی نے کہا کہ یہ قرارداد ظاہر کرتی ہے کہ دنیا جزیرہ نما کوریا پر ایٹمی ہتھیاروں کے خلاف متحد ہے۔
انہوں نے اس امریکی بیان کا خیرمقدم کیا کہ امریکہ شمالی کوریا کی حکومت تبدیل کرنا یا شمالی و جنوبی کوریا کے انضمام کو ترجیح دینا نہیں چاہتا۔
چین کے سفیر لیو جیائی نے روسی سفیر کے ہمراہ جنوبی کوریا میں تھاڈ میزائل شکن نظام کی تنصیب پر تنقید کرتے ہوئے کہا کہ اسے فوری طور پر روک دیا جائے۔
امریکہ شمالی کوریا کا دشمن نہیں ‘ریکس ٹیلرسن
یاد رہے کہ تین روز قبل امریکی وزیر خارجہ ریکس ٹیلرسن کا کہنا تھا کہ ہم شمالی کوریا کے دشمن نہیں ہم نہیں چاہتے کہ وہاں حکومت کا تختہ الٹ جائے۔
چین نےشمالی کوریا سے متعلق ہمارے لیےکچھ نہیں کیا ‘ڈونلڈ ٹرمپ
واضح رہے کہ گزشتہ ماہ امریکی صدر ڈونلڈ ٹرمپ نے کہا تھا کہ وہ چین سے بہت مایوس ہیں کیونکہ وہ شمالی کوریا کے اسلحے کے پروگرام کو روکنے کے لیے زیادہ کوشش نہیں کر رہا ہے
