The news is by your side.

Advertisement

چین: ہاتھیوں نے تباہی مچا دی، لاکھوں ڈالر کا نقصان (ویڈیو)

بیجنگ: چین کے دیہاتوں میں ہاتھیوں نے بڑی تباہی مچا دی ہے، جس سے لاکھوں ڈالر کا نقصان ہو گیا۔

تفصیلات کے مطابق چین میں ہاتھیوں کے ایک جھنڈ نے ملک کے جنوب مغربی علاقے کے دیہاتوں میں فصلوں کو تباہ کر دیا ہے جس سے کسانوں کو لاکھوں ڈالرز کا نقصان ہوا ہے۔

چین کے سرکاری چینل کا کہنا ہے کہ گزشتہ ہفتے کے دوران 15 ہاتھیوں نے مکئی کی فصلیں اکھاڑیں اور ایک گودام میں گھس کر وہاں ذخیرہ کی گئی اجناس کھا لیں، معلوم ہوا کہ مذکورہ ہاتھی نیشنل نیچر ریزرو سے نکلے تھے۔

ہاتھیوں کے اس جھنڈ کو ریاست کے دارالحکومت کنمنگ تک پہنچنے سے روکنے کے لیے ڈرون اور 360 ٹریکرز کی ایک ٹیم کو تعینات کیا گیا ہے، لیکن ابھی تک ہاتھی نہ پکڑے جانے میں نہایت ہوشیار ثابت ہوئے ہیں۔

میڈیا رپورٹس کے مطابق یہ تاحال معلوم نہیں ہو سکا ہے کہ یہ جنگلی ایشیائی ہاتھی، جو کہ چین میں ایک محفوظ کی گئی نسل سے ہیں، یونن صوبے کے ژیشوانگبانا نیشنل نیچر ریزرو سے کیوں نکلے، نہ ہی ان ہاتھیوں کی منزل کا اندازہ لگایا جا سکا۔

صوبائی حکام نے منگل کو بتایا کہ مذکورہ جھنڈ لاکھوں کی آبادی والے صوبائی دارالحکومت سے صرف 20 کلو میٹر دور ایک شہر میں تھا، ان کا اتنا دور سفر کرنا کوئی عام بات نہیں، تاہم ماہرین سمجھتے ہیں کہ جھنڈ کو اس کے سربراہ ہاتھی نے نیشنل ریزرو سے نکالا ہوگا۔

چین کے سرکاری ٹی وی کا کہنا ہے کہ اپریل کے وسط سے اب تک ان ہاتھیوں نے فصلوں کی تباہ کر کے تقریباً 10 لاکھ ڈالر سے زائد کا نقصان کیا ہے، تاہم کسی جانی نقصان کی اطلاعات سامنے نہیں آئیں۔

مقامی افراد ہاتھیوں کو کھانا فراہم کر کے اور ٹرکوں سے سڑکیں بند کر کے انھیں فصلوں سے باہر نکالنے کی کوشش کر رہے ہیں۔ رپورٹس کے مطابق یونن صوبے میں جنگلی ہاتھیوں کی تعداد تقریباً 300 ہے جو 1980 کی دہائی میں 193 تھی۔

Comments

یہ بھی پڑھیں