The news is by your side.

Advertisement

چین نے افغانستان سے اپنے شہری نکال لیے

بیجنگ: افغانستان سے امریکی افواج کے انخلا کا عمل شروع ہوتے ہی چین نے اپنے شہری واپس بلا لیے۔

تفصیلات کے مطابق چین نے افغانستان سے امریکی افواج کے انخلا میں تیزی آنے کے ساتھ ہی وہاں موجود 210 چینی شہریوں کو اپنے ملک واپس بلا لیا ہے۔

غیر ملکی میڈیا کے مطابق 2 جولائی کو ژیامن ایئر لائنز کا جہاز افغانستان میں پھنسے چینی شہریوں کو لے کر کابل سے چین کے شہر ووہان پہنچا تھا، اس سلسلے میں سوشل میڈیا پر جاری خبر میں یہ بھی کہا گیا تھا کہ افغانستان سے واپس لائے گئے چینی شہریوں میں سے 22 افراد کے کرونا ٹیسٹ مثبت آئے ہیں۔

چین کے کونسلر افیئرز ڈپارٹمنٹ نے بدھ کو اپنی ایک سوشل میڈیا پوسٹ میں کہا کہ چینی حکومت نے اپنے شہریوں کے تحفظ کو یقینی بنانے کے لیے انھیں یاددہانی کرائی ہے کہ وہ جس قدر جلد ہو سکے افغانستان سے نکلیں، حکومت نے انھیں ضروری سفری سہولیات بھی فراہم کی ہیں۔

افغان طالبان کی پیش قدمی جاری، ایک اور ضلع پر کنٹرول

واضح رہے کہ امریکی صدر جوبائیڈن کے اگست کے اواخر میں امریکی افواج کے مکمل انخلا کے اعلان کے بعد سے افغانستان میں غیر یقینی کی فضا قائم ہے، اور ملک کے مختلف حصوں میں طالبان کی کارروائیاں جاری ہیں۔

ادھر چینی حکومت نے امریکی افواج کے انخلا کے عمل پر سخت تنقید بھی کی ہے، چین کا مؤقف ہے کہ افغانستان سے امریکی افواج کا انخلا جلد بازی میں کیا گیا ہے، امریکا نے اپنی ذمہ داریوں کو پس پشت ڈالا، اور افغان عوام کو انتشار کے حوالے کر دیا۔

افغانستان میں موجودہ صورت حال کے حوالے سے آئندہ ہفتے چینی وزیر خارجہ وانگ یی شنگھائی کارپوریشن آرگنائزیشن کے اجلاس میں پاکستان، روس اور بھارت سمیت وسطی ایشیائی وزرائے خارجہ سے بات چیت بھی کریں گے۔

Comments

یہ بھی پڑھیں