بیجنگ: چین میں گیس پائپ لائن دھماکے کے نتیجے میں کم از کم 12 افراد ہلاک جبکہ متعدد زخمی ہوگئے ہیں۔
غیر ملکی میڈیا رپورٹ کے مطابق واقعہ وسطی چین کے صوبے ہوبے میں پیش آیا، جہاں رہائشی علاقے میں گیس پائپ لائن زور دار دھماکے سے پھٹ گئی، مقامی سرکاری حکام نے سوشل میڈیا پر جاری بیان میں بتایا کہ دھماکے میں ڈیڑھ سو سے زائد زخمی ہوئے ہیں، زخمیوں میں انتالیس افراد کی حالت تشویشناک ہے۔
سرکاری میڈیا کے مطابق دھماکہ مقامی وقت کے مطابق صبح چھ بجے ہوا، دھماکے میں دکاندار اور فوڈ مارکیٹ میں ناشتہ اور تازہ سبزیاں خریدنے والے افراد سب سے زیادہ متاثر ہوئے، دھماکے کے نتیجے میں متعددمکانات تباہ اور گاڑیوں کو نقصان پہنچا۔
واقعے کے بعد علاقے میں امدادی سرگرمیوں کا آغاز کردیا گیا ہے تاہم دھماکے کی وجوہات معلوم نہیں ہوسکی ہیں۔
سوشل میڈیا پر متاثرہ علاقےجاری تصاویر میں دیکھا جاسکتا ہے کہ امدادی کارکن ملبے تلے افراد کو ریسکیو کرنے میں مصروف عمل ہیں۔