بیجنگ : چین کا کہنا ہے پاکستان اوربھارت کے درمیان پرامن تعلقات دنیا کے امن کے مفاد میں ہیں، چین نے پاک بھارت کشیدگی میں کمی کےلئے مثبت کردارادا کیا۔
تفصیلات کے مطابق پاکستان اوربھارت کے درمیان حالیہ کشیدگی سے متعلق چینی وزارت خارجہ نے بیان میں کہا کہ چین نے پاکستان اوربھارت میں تناؤ کم کرانے میں مثبت کردارادا کیا، کشیدگی میں کمی کے لئےچند دیگرممالک نے بھی کوششیں کیں۔
چینی وزارت خارجہ کا کہنا تھا پاکستان اوربھارت کا پرامن طریقے سے ساتھ رہنا سب کے مفاد میں ہے، دوست ہمسائے کے طورپردونوں ممالک میں امن مذاکرات کی کوششوں اورکشیدگی کم کرنے میں کردارادا کیا۔
ترجمان نے کہا چین عالمی برادری کے ساتھ دونوں ممالک کے درمیان مذاکرات اورپرامن طریقے سے اختلافات دورکرنے کی حوصلہ افزائی کرتا رہے گا۔
یاد رہے چینی وزیر خارجہ وانگ ژی نے پاک بھارت کشیدگی ختم کر کے دونوں ممالک کو صفحہ پلٹ کر آگے چلنے کا مشورہ دیتے ہوئے کہا تھا کہ دونوں ممالک کو خطے میں امن کے لیے کشیدگی کو چھوڑ کر آگے بڑھنا ہوگا۔
مزید پڑھیں: پاکستان اوربھارت صفحہ پلٹیں اورآگےچلیں، چینی وزیرخارجہ
اُن کا کہنا تھا کہ پاک بھارت کشیدگی کو طویل مدت کےلئے بہتر تعلقات میں تبدیل ہونا چاہیے تاکہ خطے کے ممالک ایک دوسرے کے ساتھ تجارتی معاہدے کر سکیں۔
اس سے قبل چینی وزارت خارجہ نے پاک بھارت کشیدہ صورتحال پر اپنے بیان میں کہا پاکستان بھارت اچھے ہمسایوں کی طرح تعلقات نبھائیں تاکہ جنوبی ایشیا میں امن اور استحکام کا تسلسل جاری رہے۔
ترجمان کا کہنا تھا کہ امید ہے دونوں ممالک تحمل کا مظاہرہ کریں گے اور مذاکرات کے لئے سازگار اقدامات کریں گے اور جنوبی ایشیا میں پائیدار امن اور استحکام کیلئے کام کریں گے۔
واضح رہے مقبوضہ کشمیر کے علاقے پلواما میں ہونے والے دھماکے میں 44 بھارتی فوجی مارے گئے تھے، جس کے بعد بھارتی حکومت اور میڈیا نے تحقیقات کیے بغیر دھماکے کا الزام پاکستان پر عائد کردیا تھا، جسے پاکستان نے سختی سے مسترد کردیا تھا۔
بعد ازاں 27 فروری کو بھارت کی3 جنگی جہاز تباہ ہوئے تھے، تین میں سے دوپاکستان ائیر فورس نے مار گرائے تھے جبکہ بھارتی پائلٹ کو بھی حراست میں لے لیا تھا، ڈی جی آئی ایس پی آر جنرل آصف غفور نے بتایا تھا بھارتی طیارے پاکستانی حدود میں نشانہ بنائے، ایک طیارہ آزاد کشمیر دوسرا مقبوضہ کشمیر کی حدود میں گرایا۔
پاکستان نے خطے میں کشیدگی کم کرنے کے لیے بھارتی پائلٹ ابھی نندن کو رہا کیا، اس اقدام کو دنیا بھر میں سراہا گیا جبکہ عالمی طاقتوں نے بھارت کو بھی جارحانہ اقدامات سے باز رہنے کا مشورہ دیا تھا۔
