اسلام آباد : چین نے ایران کو سی پیک منصوبے میں شامل ہونے کی دعوت دے دی، چین کا کہنا ہے کہ پاک چین اقتصادی راہدای میں ایران کی شمولیت خوش آئند ہے۔ راہداری چین اور ایران کے درمیان تعاون کیلئے اچھی صورتحال ثابت ہوگی۔
پاکستان میں موجود چینی سفیر سن وی ڈونگ کا کہنا تھا کہ ایران کی سی پیک میں شمولیت تہران اور اسلام آباد دونوں کیلئے بہتر ثابت ہوگی، ایران نے پہلے سی پیک منصوبے میں شمولیت کی خواہش ظاہر کی تھی۔
چینی سفیر کا کہنا تھا کہ ایران خطے کے اہم ممالک میں سے ہے، پاک چین اقتصادی راہداری کیلئے چین اور ایران کے تعلقات بہتر بنانے کا مواقع ملے گا۔
سن وی ڈونگ نے کہا ہے کہ چین راہداری منصوبے پر اب تک 13 ارب ڈالر خرچ کرچکا ہے، سی پیک میں ایران کی شمولیت سے سب کو فائدہ ہوگا، اگر ایران بھی سی پیک میں شامل ہو جائے تو یہ چین اور ایران دونوں کی فتح ہوگی۔
مزید پڑھیں : ایران کی سی پیک منصوبے میں شمولیت کی خواہش
یاد رہے کہ ایرانی صدر حسن روحانی نے حال ہی میں نیویارک میں وزیراعظم نواز شریف سے ملاقات میں پاک چین اقتصادی راہداری منصوبے کے حوالے سے پاکستانی وزیراعظم کے وژن کی تعریف کی اور اس کا حصہ بننے کی خواہش کا اظہار کیا تھا۔
انکا کہنا تھا کہ اگر ایران چاہ بہار کی ترقی کے لئے بھارت کے بجائے چین سے مدد لے تو خطے میں بھارتی عزائم خاک میں مل سکتے ہیں۔
