بیجنگ: چینی اداکارہ کو ناک کی خوبصورتی کے لیے سرجری کروانا مہنگا پڑ گیا۔
غیرملکی خبررساں ادارے کی رپورٹ کے مطابق چینی اداکارہ گاؤ لیاؤ نے اپنی ناک خوبصورت کروانے کے لیے کاسمیٹک سرجری کروائی جس نے ان کا چہرہ ہی بگاڑ دیا اور ان کی ناک گلنے لگی۔
اداکارہ نے ناک کی کاسمیٹک سرجری خراب ہونے کے بعد اپنی تصاویر شیئر کرتے ہوئے دوسروں کو کاسمیٹک سرجری کے خطرات سے آگاہ کیا۔
گاؤ لیاؤ نے بتایا کہ اکتوبر میں ان کے ایک دوست نے جنوبی شہر گوانگزو کے کلینک میں پلاسٹک سرجری کے ایک سرجن سے ملوایا تھا۔
انہوں نے مداحوں کو بتایا کہ کاسمیٹک سرجری کے لیے چار گھنٹے لگے، میں نے سوچا تھا کہ ان چار گھنٹوں میں مجھے اور خوبصورت بنادیا جائے گا لیکن اس کے برعکس میری ناک خراب ہوگئی۔
اداکارہ نے کہا کہ انہوں نے اپنی ناک کی خوبصورتی سے معمولی سے سرجری کروائی تھی تاکہ اس سے ان کے کیریئر کو فروغ مل سکے۔
چینی اداکارہ نے کہا کہ 4 گھنٹے کی سرجری کے بعد ان کی ناک کی جلد سیاہ پڑنے لگی اور ناک گلنے لگی اور اب وہ ایک سال تک اپنی ناک کا آپریشن نہیں کرواسکتیں۔
گاؤ لیاؤ نے کہا کہ وہ 61 دن تک اسپتال میں داخل رہیں اور اس سرجری پر انہوں نے 61 ہزار 8 سو ڈالر ضائع کردئیے۔
