خونخوار درندے چیتے کو ایک شیف نے چاکلیٹ سے بنایا تو خوفزدہ ہونے کے بجائے دیکھنے والوں کا اسے کھانے کو دل للچانے لگا۔
کوئی خونخوار چیتا دھاڑتا ہوا سامنے آجائے تو بہادر سے بہادر انسان کے پسینے چھوٹ جائیں گے لیکن ان دنوں سوشل میڈیا پر اس خونخوار درندے کی وائرل ہونے والی تصاویر دیکھ کر دیکھنے والے خوفزدہ نہیں بلکہ محظوظ ہورہے ہیں۔
چیتا خوف کی علامت جبکہ چاکلیٹ ہر چھوٹے بڑے کی من پسند خوراک لیکن جب دونوں کا ملن ہو تو ایسے ہی شاہکار وجود میں آتے ہیں، ایک سوئس شیف نے چاکلیٹ سے چیتا بناکر لوگوں کو حیران کردیا ہے۔
سوئٹزرلینڈ کے شہر برن میں ایک شیف نے چاکلیٹ سے صرف چیتا ہی نہیں اسکا بچہ بھی بنایا جس کی تصاویر دیکھتے ہی دیکھتے سوشل میڈیا پر وائرل ہوگئیں۔
چاکلیٹ سے مختلف شاہکار تخلیق کرنے والے سوئس شیف نے نئے چینی سال کے آغاز پر چاکلیٹ سے چیتا بنایا، چاکلیٹ کے چیتے کو حقیقت سے قریب تر دکھانے کے لیے قابل رنگوں کا استعمال کیا گیا۔
سوشل میڈیا پر وائرل اس تصویر کو اب تک لاکھوں افراد دیکھ چکے ہیں اور کئی صارفین نے شیف کے فن کو سراہا ہے۔
واضح رہے کہ یہ پہلا موقع نہیں جب چاکلیٹ سے کوئی انہونی کھانے کی شے بنائی گئی ہو۔
مزید پڑھیں:اوپن ہارٹ سرجری کی عکاسی کرتا چاکلیٹ کیک
اس سے قبل نیوزی لینڈ میں ایک جوڑے میں اوپن ہارٹ سرجری کی عکاسی کرتا ایسا کیک تیار کیا تھا جسے کھانا بہت آسان نہیں تھا۔
