اسلام آباد : چوہدری برادران کی مولانا فضل الرحمان سے ان کی رہائش گاہ پر ملاقات ہوئی ہے، ملاقات میں چوہدری شجاعت حسین، چوہدری پرویز الہٰی اور صوبائی وزیر عمار یاسر بھی موجود تھے، جے یو آئی کا وفد بھی ق لیگ رہنماؤں سے ملاقات کرے گا۔
تفصیلات کے مطابق مسلم لیگ ق کے سربراہ چوہدری شجاعت حسین اور اسپیکر پنجاب اسمبلی چوہدری پرویز الہٰی مفاہمت کا مشن لے کر اسلام آباد میں جے یو آئی ف کے امیر کی رہائش گاہ پہنچے، ان کے ہمراہ صوبائی وزیر عمار یاسر بھی موجود تھے۔
اس موقع پر صحافیوں سے گفتگو کرتے ہوئے چوہدری پرویز الہیٰ نے کہا کہ ہم یہاں مفاہمت کیلئے آئے ہیں، امید ہے معاملہ خوش اسلوبی سے حل ہوجائے گا، مفاہمت ہو تو ساری چیزیں ٹھیک ہوجاتی ہیں۔
اس موقع پر ایک صحافی نے ان سے سوال کیا کہ کیا یہاں آنے سے پہلے آپ کا وزیراعظم عمران خان سے کوئی رابطہ ہوا؟
جس کے جواب میں پرویزالٰہی کا کہنا تھا کہ وزیراعظم نے کل صبح مذاکراتی کمیٹی کا اجلاس طلب کیا ہے، ملاقات وزیراعظم آفس میں صبح11بجے ہوگی۔ واضح رہے کہ اس موقع پر جے یو آئی ف کا وفد بھی ق لیگ رہنماؤں سے ملاقات کرے گا۔
بعد ازاں میڈیا سے گفتگو کرتے ہوئے چوہردی پرویزالہٰی نے کہا کہ مایوسی گناہ ہے اور ہم نے مایوسی کی طرف نہیں جانا، راستے نکالنے کی کوشش کررہے ہیں۔
انہوں نے کہا کہ آزادی مارچ میں جو چیزیں آرہی ہے اسی میں حل ڈھونڈ رہے ہیں, اچھا ماحول ہو تو مشکل سے مشکل مسائل بھی حل ہوجاتے ہیں۔
اسپیکر پنجاب اسمبلی نے کہا کہ اگر نیت ٹھیک ہو تو چیزیں جلدی صحیح ہوجاتی ہیں، ہم چاہتے ہیں کہ جتنی جلدی ہوسکیں معاملات حل ہوجائے، یہ بات بھائی چارے سے شروع ہوگی اور اسی پر ختم ہوگی۔
پرویزالٰہی کا کہنا تھا کہ اپوزیشن اور حکومت میں جلد معاملات حل ہونے چاہئیں، دھرنے سے سب کے لیے معاشی اوراقتصادی مسائل پیدا ہورہے ہیں، مولانا فضل الرحمان سے دیرینہ تعلقات ہیں۔
انہوں نے کہا کہ ہماری ہرممکن کوشش ہے کہ ماحول میں بہتری آئے، مزید قربت پیدا کرنی ہے تاکہ معاملات بہتری کی طرف جاسکیں، معاملات چل رہے ہیں، ڈیڈلاک نہیں ہے۔
اس موقع پر اکرم درانی نے کہا کہ ہم ایک دوسرے سے ملتے رہتے ہیں، آج سب یہاں ماحول کو ٹھنڈا کرنے کیلئے آئے ہیں، ہم ماحول کو خوشگوار رکھنے کی کوشش کریں گے۔
،اکرم درانی نے کہا کہ ایسی ملاقاتوں سے ماحول کی بہتری میں مدد ملتی ہے، مولانا کی چوہدری برادران سے بھائیوں کی طرح دوستی ہے، یہ تیسری نسل کی دوستی ہے، ہمارا کام ماحول کو بہتر بنانا ہے۔
انہوں نے کہا کہ اچھے دوستوں کی مدد سے حالات میں بہتری آتی ہے، سخت ماحول سے مزید مسائل پیدا ہورہے ہیں جن کے جلد حل میں سب کی بہتری ہے۔
