ناٹنگھم: ویسٹ انڈیز کے جارح مزاج بلے باز کرس گیل نے اپنے کیریئر کے آخری ورلڈ کپ کا شاندار آغاز کرتے ہوئے ایک اور ریکارڈ اپنے نام کرلیا۔
تفصیلات کے مطابق یونیورس باس کرس گیل نے پاکستان کے خلاف میچ میں تین چھکے لگا کر ورلڈ کپ کی تاریخ میں سب سے زیادہ 40 چھکے لگانے کا اعزاز حاصل کرلیا۔
کرس گیل نے آج پاکستان کے خلاف میچ میں 34 گیندوں پر 50 رنز کی اننگز کھیلی، ان کی اننگز میں تین چھکے اور چھ چوکے شامل تھے، انہوں نے سب سے زیادہ چھکے مارنے کا ریکارڈ ورلڈ کپ کے 27 میچ کھیل کر حاصل کیا۔
اس سے قبل یہ ریکارڈ جنوبی افریقی بلے باز اے بی ڈی ویلیئرز کے پاس تھا، ڈی ویلیئرز 23 میچوں میں 37 چھکے لگا کر دوسرے نمبر پر موجود ہیں۔
Chris Gayle has now hit more sixes than anyone in Cricket World Cup history! #CWC19 pic.twitter.com/j4SG3UCzBP
— Cricket World Cup (@cricketworldcup) May 31, 2019
آسٹریلوی ٹیم کے سابق کپتان رکی پونٹنگ ورلڈ کپ کے 46 میچوں میں 31 چھکے لگا کر تیسرے نمبر پر ہیں، نیوزی لینڈ کے اوپنر بلے باز برینڈن میکولم 34 میچوں میں 29 چھکے لگا کر چوتھے نمبر پر موجود ہیں۔
بھارتی بلے باز سچن ٹنڈولکر اور سری لنکا کے سابق کھلاڑی سنتھ جے سوریا 27 چھکوں کے ساتھ پانچویں نمبر پر براجمان ہیں۔
واضح رہے کہ ٹی ٹوینٹی انٹرنیشنل میں سب سے زیادہ چھکے لگانے کا اعزاز بھی کرس گیل کو حاصل ہے، کرس گیل نے ٹی ٹوینٹی کرکٹ میں 105 چھکے لگائے ہیں۔
