The news is by your side.

Advertisement

سانحہ کرائسٹ چرچ : پاکستان کی عیسائی برادری کا شہداء کے لواحقین سے اظہار یکجہتی

لاہور کے نولکھا چرچ میں خصوصی دعائیہ تقریب کا انعقاد، علماء کرام، اقلیتی اور سول سوسائٹی رہنماؤں شرکت

لاہور : سانحہ کرائسٹ چرچ میں شہید ہونے والے مسلمانوں کے لواحقین سے پاکستان کی عیسائی برادری نے بھی اظہار یکجہتی کیا، لاہور کے چرچ میں دعائیہ تقریب کا انعقاد کیا گیا۔

تفصیلات کے مطابق لاہور کے نولکھا چرچ میں سانحہ نیوزی لینڈ میں شہید ہونے والے نو پاکستانیوں سمیت پچاس سے زائد شہداء کے ساتھ اظہار یکجہتی کیلئے خصوصی دعائیہ تقریب کا انعقاد کیا گیا۔

تقریب میں مختلف مسالک کے علماء کرام، اقلیتی رہنماﺅں اور سول سوسائٹی کی شخصیات نے شرکت کی۔ مساجد پر دہشت گردی کے واقعے کے خلاف بین المذاہب ہم آہنگی کے زیر اہتمام خصوصی دعائیہ سروس کے بعد شہداء سے اظہار یکجہتی کیلئے شمعیں روشن کی گئیں۔

اس موقع پر گفتگو کرتے ہوئے مختلف مسالک کے علماءاور اقلیتی رہنماﺅں کا کہنا تھا کہ اقوام عالم کو دہشت گردی کے خاتمے کیلئے ازسرنو مؤثر اقدامات کرنا ہوں گے۔

مقررین نے کہا کہ دہشت گردوں کا نہ کوئی مذہب ہوتا ہے اور نہ ہی علاقہ، دہشت گردی کا ناسور پوری انسانیت کیلئے خطرناک ہے۔ پاکستانی قوم خصوصاً عیسائی برادری نیوزی لینڈ میں ہونے والے اس اندوہناک واقعے کی شدید الفاظ میں مذمت کرتی ہے۔

تقریب سے ڈاکڑ مجید ایبل سربراہ پریسبٹیریں چرچ، ذکر اللہ مجاہد امیر جماعت اسلامی لاہور اور پادری شاہد معراج سمیت دیگر نے خطاب کرتے ہوئے دہشت گردی کے ناسور کو جڑ سے اکھاڑ پھینکنے کیلئے عالمی سطح پر مشترکہ کوششوں کی ضرورت پر زور دیا

Comments

comments

یہ بھی پڑھیں