واشنگٹن : امریکی اخبار واشنگٹن پوسٹ نے سی آئی اے ڈائریکٹر مائیک پومپیو کی شمالی کوریا کے سربراہ کم جونگ ان سے خفیہ ملاقات کا انکشاف کیا ہے، خفیہ ملاقات کاصرف دو لوگوں کو معلوم تھا۔
تفصیلات کے مطابق امریکی اخبار واشنگٹن پوسٹ نے دعویٰ کیا ہے کہ نامزد وزیر خارجہ مائیک پومپیو نے شمالی کوریا کا خفیہ دورہ کیا تھا اور ٹرمپ کے سفیر کی حیثیت سے شمالی کوریا کے سربراہ کم جونگ ان سے پیانگ یانگ میں ملاقات کی تھی۔
میڈیا رپورٹس کے مطابق سی آئی اے چیف اور کم جونگ ان کی خفیہ ملاقات کا صرف دو لوگوں کو معلوم تھا اور ملاقات کا مقصدصدرٹرمپ اورکم جونگ کی ملاقات کی تفصیلات طے کرنا تھا۔
دوسری جانب امریکی صدرڈونلڈ ٹرمپ کا کہنا ہے کہ شمالی کوریا سے اعلیٰ ترین سطح پر براہ راست بات چیت ہو رہی ہے، بہت جلد ان سے ملنے کی امید ہے۔
فلوریڈا میں صدر ٹرمپ نے جاپان کے وزیراعظم شِنزو آبے سے ملاقات کے موقعے پر شمالی کوریا کے سربراہ سے رابطے کی تصدیق کرتے ہوئے کہا تھا کہ پانچ مقامات پرغورکیا جارہا ہے جہاں میری اورکم جونگ ان کی ملاقات ہوسکتی ہے۔
یاد رہے کہ امریکی صدر ڈونلڈ ٹرمپ نے گذشتہ ماہ شمالی کوریا کے صدر کم جونگ ان کی جانب سے ملاقات کی پیش کش کو قبول کی تھی، دونوں رہنما اگلے مہینے مئی میں ملاقات کریں گے۔
واضح رہے کہ شمالی کوریا اورامریکا کے تعلقات طویل عرصے سے تناؤ کا شکاررہے ہیں، دوہزارکے بعد امریکا اورشمالی کوریا میں یہ پہلا براہ راست اعلی سطح کا رابطہ ہے۔
خیال رہے کہ شمالی کوریا کے رہنما کم جونگ ان نے سال نو پرامریکہ کو دھمکی دیتے ہوئے کہا تھا کہ امریکہ شمالی کوریا کے جوہری ہتھیاروں کے نشانے پرہے۔
بعدازاں امریکی صدر ٹرمپ نے 3 جنوری 2018 کو شمالی کوریا کو دھمکی دیتے ہوئے کہا تھا کہ میرے پاس ان سے بڑا طاقتور نیو کلیئربٹن ہے اوربٹن وقت پڑنے پر کام بھی کرے گا۔
