واشنگٹن : امریکی انٹیلیجنس ایجنسی سی آئی اے نے ایک کروڑ تیس لاکھ صفحات پر مشتمل خفیہ دستاویزات آن لائن جاری کردیں، عوام اب ان دستاویزات تک رسائی حاصل کرسکتے ہیں۔
امریکی سینڑل ایجنسی نے خفیہ دستاویزات تک عوام کو رسائی دے دی، سی آئی اے نے ایک کروڑ تیس لاکھ صفحات پرمشتمل خفیہ دستاویزات آن لائن جاری کردیں، ان دستاویزات کے منظرعام پر آنے سے سی آئی اے کی تاریخ اور سرگرمیوں سے متعلق نئی معلومات سامنے آئیں گی۔
جاری کردہ خفیہ دستاویزات میں ویتنام، کوریا اور سرد جنگ کے تنازعات کے دوران سی آئی اے کی سرگرمیوں کی تفصیلات موجود ہیں۔
اڑن طشتری اور اسٹار گیٹ پروگرام کی تحقیقات سے متعلق معلومات بھی جاری کی گئی دستاویزات میں شامل ہیں، دستاویزات میں متعدد معلومات اور ان کے ذرائع کوقومی سلامتی کے پیش نظرخفیہ رکھا گیا ہے۔
دستاویزات کے اس بہت بڑے ذخیرے میں اس ادارے کی سن 1940 سے 1990ء تک کی سرگرمیوں سے متعلق معلومات موجود ہیں۔ بتایا گیا ہے کہ ان دستاویزات میں 73 ہزار جرمنی کے حوالے سے بھی ہیں۔
واضح رہے کہ ان دستاویزات میں اس ادارے کی حالیہ برسوں کی سرگرمیوں سے متعلق مواد شامل نہیں ہے۔
سی آئی اے کے انفارمیشن مینجمنٹ ڈائریکٹر جوزف لیمبرٹ کا کہنا ہے کہ سی آئی اے کی تاریخی دستاویزات کا جائزہ دنیا کے کسی بھی حصے میں بیٹھ کر لیا جا سکتا ہے۔
