کراچی : سندھ ہائی کورٹ نے سول ایوی یشن اتھارٹی کو شاہین ایئر انٹرنیشنل کے آپریشنز بند کرنے سے روک دیا، تمام آپریشنز اور فلائٹ شیڈول معمول کے مطابق جاری ہیں۔
تفصیلات کے مطابق ترجمان شاہین ایئر لائن نے کہا ہے کہ سول ایوی یشن اتھارٹی کی جانب سے شاہین ایئر لائن کو جاری کیا گیا تھا،13جولائی کو جاری کردہ خط میں سول ایوی یشن نے شاہین ایئر کو واجبات کی عدم ادائیگی پر اس کے تمام انٹرنیشنل آپریشنز بند کرنے کا حوالے سے ہدایات جاری کی تھیں۔
شاہین ایئر نے اس اقدام کے حوالے سے سندھ ہائی کورٹ سے رجوع کیا تھا، ترجمان شاہین ایئر لائن کا کہنا ہے کہ سندھ ہائی کورٹ نے شاہین ایئر کے حق میں فیصلہ دیتے ہوئے سول ایوی یشن کی ہدایات کو معطل کر دیا ہے۔
ترجمان کا مزید کہنا ہے کہ شاہین ایئر قانون کی پاسداری کرنے والا ادارہ ہے اور ملک کی سب سے بڑی نجی ایئر لائن ہونے کے نا طے اپنی ذمہ داریوں سے بخوبی واقف ہے اور شاہین ایئر کے تمام آپریشنز اور فلائٹ شیڈول معمول کے مطابق جاری ہیں۔
یاد رہے کہ ڈیڑھ ارب روپے کے لگ بھگ واجبات کی عدم ادائیگی پر پاکستان سول ایوی ایشن اتھارٹی نے گزشتہ دنوں شاہین ائیر انٹرنیشنل کی سعودی عرب کے سوا تمام بین الاقوامی پروازوں کے لیے ملک کے تمام ائیرپورٹس پر فراہم کی جانے والی خدمات اور سہولیات مورخہ 16جولائی سے معطل کرنے کا فیصلہ کیا تھا۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
محمد صلاح الدین اے آروائی نیوز سے وابستہ سینئر صحافی ہیں اور ایوی ایشن سے متعلقہ امور کی رپورٹنگ میں مہارت رکھتے ہیں