راولپنڈی : بھارتی فوج نے لائن آف کنٹرول کی خلاف ورزی کرتے ہوئے تھرتی نار گاؤں پر بلااشتعال فائرنگ کی ، جس کے نتیجے میں ایک شہری شہیداور 3 زخمی ہو ہوگئے۔
پاک فوج کے شعبہ تعلقات عامہ (آئی ایس پی آر) کے مطابق بھارتی فوج کی ایل اوسی پر اشتعال انگیزیوں کا سلسلہ جاری ہے ، بھارتی فوج کی تھرتی نار گاؤں پر بلااشتعال فائرنگ سے ایک شہری شہیداور 3 زخمی ہو ہوگئے۔
آئی ایس پی آر کا کہنا ہے کہ زخمیوں کو تحصیل ہیڈ کوارٹراسپتال ٹرنکیال منتقل کردیا گیا۔
ترجمان کے مطابق پاک فوج کی جانب سے بھرپورجوابی کارروائی کرتے ہوئے بھارتی بندوقوں کے منہ خاموش کروا دیئے اور شہریوں کونشانہ بنانے والی بھارتی چوکی کونشانہ بنایا گیا۔
مزید پڑھیں : ایل او سی پر بھارتی فوج کی فائرنگ سے 19 سال کا نوجوان شہید
گذشتہ روز بھی بھارت کی جانب سے بلا اشتعال فائرنگ سے 19 سالہ نوجوان شہید ہوگیا تھا، شہید نوجوان انضمام ایل او سی کے قریب گاؤں تتری نوٹ کا رہائشی تھا اور دریائے پونچھ کے کنارے پر گھاس کاٹ رہا تھا۔
یاد رہے کہ دفتر خارجہ نے اپنی ایک بریفنگ میں بتایا تھا کہ بھارت کی جانب سے مسلسل بھاری ہتھیاروں کا استعمال کیا جا رہا ہے۔ نئے سال کے آغاز سے بھارت اب تک 150 مرتبہ سیز فائر کی خلاف ورزیاں کر چکا ہے۔
واضح رہے کہ رواں برس بھارتی فوج کی جانب سے متعدد بار لائن آف کنٹرول کی خلاف ورزی کی جاتی رہی ہے، بھارت اپنے داخلی اور سیاسی کشیدگی اور کشمیر میں جاری ظلم و بربریت سے توجہ ہٹانے کے لیے لائن آف کنٹرول پر بلااشتعال فائرنگ کا عمل جاری رکھے ہوئے ہے۔
اقوام متحدہ میں پاکستان کی مستقل مندوب ملیحہ لودھی نے بتایا تھا کہ سال 2017 میں بھارت نے 1137 بار سرحدوں پر بلا اشتعال فائرنگ کی جس کے نتیجے میں 47 شہری جاں بحق جبکہ 159 افراد زخمی ہوئے۔
