The news is by your side.

Advertisement

نویں جماعت کی مارک شیٹس جاری کرنے کا اعلان

کراچی: جماعت نہم (سائنس گروپ) کی مارک شیٹس جاری کرنے کا اعلان ہو گیا۔

ثانوی تعلیمی بورڈ کراچی نے سال 2021 ایس ایس سی پارٹ وَن (جماعت نہم) سائنس گروپ کی مارک شیٹس 26 جنوری 2022 سے جاری کرنے کا اعلان کر دیا ہے۔

چیئرمین ثانوی تعلیمی بورڈ سید شرف علی شاہ کی ہدایت کے مطابق ناظم امتحانات ظہیر الدین بھٹو نے تمام الحاق شدہ تعلیمی اداروں کے سربراہان سے کہا ہے کہ وہ متعلقہ تاریخوں کو اپنے اتھارٹی لیٹر، شناختی کارڈ کی کاپی یا اپنے نمائندے کی آفس کارڈ کی کاپی کے ساتھ بورڈ آفس کی پہلی منزل بلاک B کانفرنس ہال سے صبح 9:30 بجے سے شام 4:00 بجے تک مارک شیٹس حاصل کر سکتے ہیں۔

ہدایت کی گئی ہے کہ کووڈ 19 کے بڑھتے ہوئے کیسز کی وجہ سے بورڈ آفس میں مکمل ایس او پیز کا خیال اور سماجی فاصلہ ضرور رکھا جائے، اور ماسک کا استعمال لازمی کریں۔

انھوں نے اسکولوں کے سربراہان کو ہدایت کی ہے کہ مارک شیٹس حاصل کرنے کے بعد فوری طور پر طلبہ و طالبات کو لازمی دے دی جائیں۔

شیڈول کے مطابق بدھ 26 جنوری کو نیو کراچی، نارتھ ناظم آباد، گلبرگ، لیاقت آباد، جمعرات 27 جنوری کو جمشید ٹاؤن، گلشن اقبال، شاہ فیصل کالونی، جمعہ 28 جنوری کو لانڈھی، کورنگی، ملیر، بن قاسم اور ہفتہ 29 جنوری کو لیاری، کیماڑی، بلدیہ ٹاؤن، سائٹ، اورنگی ٹاؤن، گڈاپ، صدر کی مارک شیٹس حاصل کی جا سکیں گی۔

طلبہ و طالبات کی سہولت کے لیے اسکروٹنی فارم جمع کرانے کی تاریخ کا اعلان پہلے ہی 18 جنوری کو کیا جا چکا ہے۔

Comments

یہ بھی پڑھیں