The news is by your side.

Advertisement

کلاسیکی موسیقی کے نام وَر استاد شرافت علی خان کی برسی

پاکستان میں‌ سُر اور آواز کے ساتھ ساتھ ساز اور آلاتِ موسیقی بجانے میں‌ مہارت رکھنے والے نام ور فن کاروں کا تعلق مختلف ایسے گھرانوں‌ سے رہا ہے جو تقسیم ہند سے قبل بھی کلاسیکی موسیقی اور فنِ گائیکی میں نام و مقام رکھتے تھے۔

انہی میں سے ایک شام چوراسی گھرانا بھی ہے جس میں استاد شرافت علی خان جیسے فن کار پیدا ہوئے۔ آج اسی مشہور موسیقار اور گلوکار کی برسی ہے۔ وہ 30 نومبر 2009ء کو لاہور میں وفات پاگئے تھے۔

استاد شرافت علی خان 1955ء میں ملتان میں پیدا ہوئے تھے۔ وہ نام ور موسیقار استاد سلامت علی خان کے فرزند اور شفقت سلامت علی خان کے بڑے بھائی تھے۔

گورنمنٹ کالج لاہور سے گریجویشن کے بعد انھوں نے اپنے والد سے ٹھمری، کافی اور غزل گائیکی کی تربیت حاصل کی اور دنیا کے متعدد ممالک میں اپنے فن کا مظاہرہ کیا۔ انھوں نے اپنے والد اور اسی فن سے وابستہ بھائیوں کے ساتھ بھی اپنے فن کا مظاہرہ کیا اور شائقین و قدردانِ فن سے خوب داد سمیٹی۔ بیرونِ ملک انھیں باقاعدہ دعوت دے کر پرفارمنس کا مظاہرہ کرنے کے لیے بلایا جاتا تھا۔ انھیں بیرونِ ملک کئی جامعات میں کلاسیکی موسیقی پر لیکچر بھی دینے کا موقع بھی ملا تھا۔

کلاسیکی موسیقی اور گائیکی کی دنیا کے اس نام کو حضرت چراغ شاہ ولی کے مزار کے احاطے میں سپردِ خاک کیا گیا۔

Comments

یہ بھی پڑھیں