دبئی : متحدہ عرب امارات میں گزشتہ کئی دنوں سے جاری صفائی مہم کے دوران رضاکاروں نے ایک سو دس ٹن کچرا جمع کرلیا۔
تفصیلات کے مطابق گزشتہ دس روز سے امارات میں ’ کلین اپ یو اے ای‘ کے عنوان سے صفائی مہم جاری تھی جس میں رضاکاروں نے ملک کے کئی اہم مقامات سے کچرا چن کر انہیں صاف کردیا۔
مقامی میڈیا ذرائع کا دعویٰ ہے کہ اس عمل میں ایک لاکھ 25 ہزار سے زائد رضاکاروں نے حصہ لیا اور اس دوران انہوں نے کل 146 مقامات سے محض دس دنوں میں 110 ٹن کچرے صاف کیا۔
اس موقع پر رضاکاروں کے پاس بائیوڈی گریڈیبل کچرے کے بیگز تھے اورری سائیکل ہونے والے کاٹن کے دستانے استعمال کیے گئے تھے، کہا جارہا ہے کہ جو کچرا جمع کیا گیا ، رضا کار اس میں سے بہت کچھ ری سائیکل کرسکتے ہیں۔
یاد رہے کہ یورپ میں ایک شخص عمومی طور پر 12 سو گرام کچرا پیدا کرتا ہے تاہم یو اے ای میں یہ مقدار دوگنا زیادہ ہے یعنی ایک اماراتی شخص اوسطاً دو کلو سات سو گرام کچرا پیدا کرتا ہے اور رمضان کے دنوں میں یہ مقدار لگ بھگ ساڑھے پانچ کلو ہوجاتی ہے۔
خیال رہے کہ دبئی میں کئی ایسے مقامات ہیں جہاں کچرے کو ری سائیکل کی جاتا ہے اور متحدہ عرب امارات ان دنوں کچرے کے استعمال کو کم سے کم کرنے کے لیے اقدامات کررہا ہے۔ تاحال یہ اقدامات ناکافی ہیں لیکن اچھی بات یہ ہے کہ اماراتی شہری نئے سال کا استقبال اپنے ملک کو صاف کرکے کررہے ہیں۔
