کیو: یوکرین میں بادل کی ایک ایسی تصویر سامنے آئی جسے دیکھ کر لوگ خوفزدہ ہوگئے اور سمجھنے لگے کے یوکرین میں ایٹمی دھماکا ہوگیا ہے۔
غیرملکی خبررساں ادارے کی رپورٹ کے مطابق چند روز قبل یورپی ملک یوکرین میں عجیب و غریب بادل کی تصویر نے خوف و ہراس پھیلا دیا بعد میں پتا چلا کہ یہ ایٹمی دھماکا نہیں ہے بلکہ بادل کی تصویر ہے۔
یہ تصویر یوکرین کے دارالحکومت کیو میں دیکھی گئی اور دیکھتے ہی دیکھتے سوشل میڈیا پر وائرل ہوگئی، کیو 1986 میں ایٹمی بجلی گھر کی تباہی سے مشہور ہونے والے مقام چرنوبل سے صرف 60 میل کی دوری پر ہے۔
چرنویل سے قربت اور ماضی کی یادوں نے یوکرین میں سوشل میڈیا صارفین کو ہکا بکا کردیا اور وہ اس تصویر کو روس کی جانب سے نیا ایٹمی دھماکا قرار دینے لگے۔
محکمہ موسمیات کے ماہرین نے اس تصویر کی وضاحت دیتے ہوئے بتایا کہ یہ بارش برسانے والا ایک خاص بادل ہے جسے اینول کلاؤڈ کہا جاتا ہے جو اوپر سے چپٹا اور پھیلا ہوتا ہے جبکہ اس کا نچلا حصہ پتلا ہوتا چلا جاتا ہے۔
محکمہ موسمیات کے ماہرین کی وضاحت کے باوجود سوشل میڈیا پر اس تصویر کو لوگوں نے ایٹمی دھماکے کے ثبوت کے طور پر وائرل کرنے سلسلہ جاری رکھا اور لوگوں کو گمراہ کرتے رہے۔
