کوئٹہ: وزیر اعلیٰ بلوچستان میر عبدالقدوس بزنجو کا کہنا ہے کہ سیلاب زدگان کو تنہا نہیں چھوڑیں گے، بلوچستان کا زیادہ تر بجٹ امن و امان کی صورتحال کو بہتر کرنے پر خرچ ہوتا ہے۔
تفصیلات کے مطابق وزیر اعلیٰ بلوچستان میر عبدالقدوس بزنجو کا کہنا ہے کہ سیلاب زدگان کو تنہا نہیں چھوڑیں گے، ڈیم ٹوٹنے سے بہت نقصانات ہوئے، ذمہ داروں کا تعین کریں گے۔
وزیر اعلیٰ کا کہنا تھا کہ متاثرین کو گھروں کی تعمیر کے لیے پیسے دیں گے۔
انہوں نے کہا کہ وفاقی حکومت کا ہر مشکل گھڑی میں تعاون حاصل رہا، نیا این ایف سی ایوارڈ وقت اور حالات کی ضرورت ہے۔ بلوچستان کا زیادہ تر بجٹ امن و امان کی صورتحال کو بہتر کرنے پر خرچ ہوتا ہے۔
وزیر اعلیٰ نے کہا کہ یہ حقیقت ہے کہ صوبہ مالی مشکلات سے دو چار ہے، جلد پارلیمانی لیڈروں کے ساتھ وزیر اعظم سے ملاقات کریں گے۔ مالی بحران ہو یا ریکوڈک منصوبہ پوری اسمبلی کو اعتماد میں لیا۔
انہوں نے کہا کہ یورپی یونین کے وفد کو ٹائم نہ دینے کی خبریں غلط ہیں، یورپی یونین وفد سے ملاقات مس کوآرڈینیشن کے باعث نہ ہوسکی، امریکی سفیر سمیت دیگر غیر ملکی وفود کو بلوچستان میں سرمایہ کاری کی دعوت دی ہے۔